Тоҷикистон дар як соли охир дар шохиси “Хушбахтарин кишварҳои ҷаҳон” 5 зина поён рафта, бадбахтарин кишвари Осиёи Марказӣ дониста шуд.
Созмони Милали Муттаҳид 18-уми марти соли ҷорӣ гузориши шохиси хушбахтарин кишварҳои ҷаҳонро барои соли 2022 нашр кард, ки дар он Тоҷикистон дар байни 146 кишвари ҷаҳон дар ҷои 83-юм қарор дорад.
Гузоришгарони СММ Тоҷикистонро бо 5377 хол дар байни кишварҳои Осиёи Марказӣ дар ҷои охирон қарор дода, Қазоқистонро, ки дар байни кишварҳои ҷаҳон мақоми 40-умро ишғол кардаааст, хушбахттарин кишвари минтақа донистаанд. Ҳамин тариқ дар ин шохис Узбекистон дар ҷои 53-ум, Қирғизистон дар ҷои 64-ум, Туркманистон дар ҷои 78-ум қарор доранд.
Аз соли 2012 ин ҷониб гузориши шохиси хушбахтарин кишварҳои ҷаҳон аз ҷониби СММ ҳар сол таҳия ва нашр мешавад. Дар ин шохис барои арзёбии хушбахтии миллӣ 6 омил ҳамчун меъёри санҷиш истифода мешавад: ММД ба ҳар сари аҳолӣ, дастгирии иҷтимоӣ, давомнокии умр, озодии шаҳрвандон дар қабули қарорҳои ҳаётан муҳим, саховатмандӣ ва муносибат ба коррупсия. Ҳар як омил аз рӯи ҷадвали 10-холӣ арзёбӣ мешавад.
Соли 2011 Маҷмаи Умумии Созмони Милали Муттаҳид бо қабули як қатънома аз кишварҳои узви ин созмон даъват карда буд, ки хушбахтии мардуми худро арзёбӣ кунанд ва онро ҳамчун меъёр дар сиёсати давлатӣ истифода баранд.
