Муҳоҷирони меҳнатии кишварҳои ИДМ, ки дар Русия кору зиндагӣ мекунанд, бо бад шудани авзои иқтисодӣ ин кишварро тарк карданиянд, ба ҷуз шаҳрвандони Тоҷикистон.
Баъзе аз намояндагони диаспораҳои муҳоҷирони кории кишварҳои собиқи Шӯравӣ дар Русия ба хабаргузории “Ведомости” дар бораи хуруҷи шаҳрвандонашон ба кишварҳои худ хабар доданд.
Муҳоҷирон далели тарк кардани Русияро ба аз ҳад зиёд поин рафтани арзиши рубли русӣ рабт медиҳанд. Максатбек Абдуназар, диаспори қирғиз мегӯяд: “Муҳоҷирон барои кор кардан ва ба хонаҳояшон пул фиристодан инҷо меомаданд, ҳоло ба сабаби поин рафтани қурби рубли русӣ будан инҷо ба фоидаашон нест”. Ба гуфтаи ӯ, “пештар 1000 рубли русӣ баробар ба 1400 соми қирғизӣ буд, аммо ҳоло 1000 рубл ба 600 сом поин фаромадааст.”
Дар ҳамин ҳол шабакаи телеграмии “Многонационал” менависад, ки шаҳрвандони Тоҷикистон баракс, то охирин фурсат талош мекунанд дар Расия боқӣ бимонанд, зеро дар ватанашон ҷои кор надоранд.
Як муҳоҷири кории тоҷик бо номи Далер ба “Многонационал” гуфта, ки бо вуҷуди ҷои кори худро аз даст доданаш намехоҳад ба Тоҷикистон баргардад. “Ман агар ба Тоҷикистон баргардам, маро ба артиш мебаранд, ҳарчанд ятим ба воя расидаам ва дар оила писари ягона ҳастам, вале шунидам, ки мисли ман будаҳоро низ мебаранд”, мегӯяд Далер. Ӯ афзуда, ки агар дар Русия кори хубе пайдо накунад, ба Туркия мераваду ба ватанаш барнамегардад.
Пас аз ҳамлаи Русия ба Украина субҳи рӯзи 24-уми феврал Аврупо ва Амрико алайҳи Русия таҳримҳои шадиде ҷорӣ карданд, ки ба сабаби он аксари муҳоҷирони меҳнатии шаҳрвандони кишварҳои Осиёи Марказӣ ҷойҳои кории худро аз даст доданд ва аз тарафи дигар нархи рубли русӣ бесобиқа дар ин кишварҳо поин рафт, ки ин ҳодиса муҳоҷиронро ба тасмими хуруҷ аз Русия водор кард.
