Дар давраи дуюми интихоботи президентии Фаронса, ки рӯзи 24-уми апрел баргузор гардид ва дар он Эммануэл Макрон ва Марин Ле Пен бо ҳам рақобат карданд, Макрон бори дигар президент интихоб шуд.
Пас аз ба поён расидани интихоботи имрӯза дар Фаронса ва шумориши оро, Эммануэл Макрон бо ба даст овардани 58,8 дарсади овозҳо дигарбора президенти Фаронса интихоб шуд ва рақиби ӯ хонум Ле Пен 41,2 дарсади ороро ба даст оварда, мағлуб дониста шуд.
Хонум Ле Пен пас аз эълони натоиҷи интихоботи рӯзи якшанбе шикасти худро пазируфт. Ӯ аз интихлбкунандагонаш изҳори ташаккурӣ кард ва гуфт, ки “Фаронса беш аз ҳад фаромӯш шудааст, аммо мо Фаронсаро фаромӯш намекунем”.
Давраи аввали интихоботи президентии Фаронса рӯзи 11-уми апрел баргузор шуд, ки дар он Макрон 27,6% ва рақиқбии аслии ӯ хонум Марин Ле Пен, номзади рости ифротӣ 23,4%-и овозҳоро соҳиб шуданд.
Дар давраи аввали интихобот 12 номзад аз ҳизбҳои гуногуни Фаронса ширкат карданд, ки ғайр аз Макрон ва Ле Пент боқӣ номзадҳо дар маҷмуъ аз 21,95% то 0,57% овози интихобкунандаконро ба даст оварда буданд. Пас аз эълони натоиҷи оро, ҳам Макрон ва ҳам Ле Пен аз тарафдорони дигар ҳизбҳое, ки дар давраи аввал ба онҳо раъй надода буданд, хостанд, ки дар давраи дуввум ба онҳо раъй бидиҳанд ва аз онҳо пуштибонӣ кунанд.
Эммануэл Макрон, ки рӯзи 24-уми апрел пас аз эълони пирӯзияш дар назди ҳаводоронаш суханронӣ менамуд, гуфт, ки “медонам аксарият барои ақоидам маро интихоб накардаанд, вале барои “пеши роҳи рости ифротиро гирифтан” ба ман раъй доданд”.
Ёдовар мешавем, ки Макрон дар интихоботи президентии Фаронса дар соли 2017 бо гирифтани 24,01% ва Ле Пен бо 21,3% овозҳо дар давраи дуввум бо ҳам рақобат карда буданд, ки дар давраи дуввум Макрон бо соҳиб шудани 66,10%-и оро президенти Фаронса эълон шуд.
