Субҳи 27-уми майи соли ҷорӣ дар шаҳри Душанбе давраи 4-уми нишасти Муколамаи амнияти минтақаӣ дар бораи Афғонистон бо ҳузури дабирони шӯрои амнияти кишварҳои ҳамсоя ва минтақа баргузор шуд.
Нишасти имрӯза бо ҳузури котибони шӯроҳои амниятӣ ва мушовирони амнияти миллии кишварҳои Русия, Чин, Эрон, Тоҷикистон, Узбекистон, Қирғизистон, Қазоқистон, Туркманистон, Ҳиндустон ва Покистон бидуни ҳузури намояндагони Толибон баргузор гашт.
Дар нишаст масъалаи зарурати беҳбуд бахшидани равобити нақлиётӣ дар саросари минтақа ва рушди низоми маориф барои барқарории иқтисодиву иҷтимоии Афғонистон ҳамчун омилҳои асосии амнияти иқтисодии минтақа ва Афғонистон дониста шуд.
Дар охири нишаст аз ҷониби иштирокдорон изҳороти муштараке қабул гардид, ки дар он ғайри қобили қабул будани истифодаи қаламрави Афғонистон аз ҷониби созмонҳои байналмилалии террористӣ барои паноҳгоҳ, омӯзиш, тарҳрезӣ ё маблағгузории ҳамагуна амали террористӣ алайҳи кишварҳои ҳамсоя ва минтақа таъкид шудааст.
Ёдовар мешавем, ки давраи 3-уми нишасти Муколамаи амнияти минтақаӣ дар бораи Афғонистон моҳи ноябри соли 2021 дар пойтахти Ҳиндустон доир шуда буд. Дар он нишаст низ намояндагони Толибон ширкат надоштанд. Ва ҳамчунин таъкидҳое бар зарурати амнияти минтақа, амнияти нақлиётӣ, расондани кумакҳои башардӯстона ба Афғонистон таъкидҳо шуда буд.
Аз моҳи августи соли 2021 Толибон қудратро дар Афғонистон ба даст гирифтанд, вале то кунун ҳеч кишваре ҳукумати онҳоро ба таври расмӣ эътироф накардааст.
