27-уми майи соли ҷорӣ чанд тан аз сокинони Вилояти Мухтори Кӯҳистони Бадахшон, ки аз Маскав ба Душанбе баргаштаанд, пас аз расидан дар фурӯдгоҳ бе нишон шуданд.
Pamir Daily News, ки бештар хабарҳо ва ҳодисаҳои Бадахшонро пӯшиш медиҳад, менависад, ки аксари онҳо сокинони Хоруғ ва Роштқалъа мебошанд.
“Онҳо бори охир аз фурӯдгоҳи Душанбе дар тамос шуда, хабар доданд, ки ҳамаи мардони каму беш қавиро дар фурӯдгоҳ боздошт карда, ба самти номаълум бурда истодаанд”, – менависад Pamir Daily дар истинод ба манбааш.
Инчунин дар нуқтаҳои марзӣ бо Узбекистон ва дар фурӯдгоҳи Душанбе аз мавҷудияти рӯйхати муайяни сокинони ВМКБ хабар дода мешавад.
Бино ба қавли як манбае, ки чанд рӯзи пеш аз марзи заминӣ Тоҷикистонро тарк кардааст, дар нуқтаҳои марзбонии кишвар рӯйхати ягонаи номгӯи сокинони Бадахшон тартиб дода шудааст. “Агар шиносномаат аз ВМКБ дода шуда бошад, онҳо маълумотро аз рӯйхати тартибдодашуда барои сокинони ин вилоят тафтиш мекунанд ва танҳо пас аз тафтиш барои убури сарҳади давлатӣ иҷозат медиҳанд”, мегӯяд манбаъ.
Тафсилоти ин хабар пас аз пайдо шудани маълумоти бештар такмил мешавад.
