Ораз ва Рамзӣ Вазирбековҳо фаъолони зодаи Бадахшон, ки рӯзи 29-уми июл соли 2022 аз фурӯдгоҳи Домодедовои Маскав нопадид шуда буданд, дар навори видеоие хабар доданд, ки дар Тоҷикистон дар назди мақомот қарор доранд.
Дар ин видео, ки рӯзи 31-уми июл дар шабакаҳои иҷтимоии наздик ба мақомоти тоҷик нашр шуд, онҳо мегӯянд, ки “ихтиёрӣ” ба Ватан баргаштаанд, то ба суолҳои мақомот дар робита ба ҳодисаҳои шаҳри Хоруғ посух диҳанд.
Ораз Вазирбеков дар ин видео мегӯяд “ман омода ҳастам, ки ба ҳамаи ин саволҳо ҷавоб диҳам ва агар гунаҳгор нестам, озод мешавам ва гашта меравам”.
То ҳол маълум нест, ки Ораз ва Рамзӣ Вазирбековҳо таҳти чӣ шароите ин наворро сабт кардаанд ва дар назди кадом ниҳоди интизомии кишвар қарор доранд.
Дар ҳамин ҳол Сабрина Отамбекова, ҳамсари Ораз Вазирбеков, рӯзи 1-уми август дар суҳбат бо Радиои Озодӣ гуфт, шавҳараш аз Екатеринбург ба Маскав бармегашт, вале дигар аз фурӯдгоҳ берун нашуд.
Ҳамсари Ораз Вазирбеков мегӯяд, ки баъди нишастани ҳавопаймо дар фурӯдгоҳи Маскав бо шавҳараш суҳбат доштааст, аммо вақте дубора баъд аз 20 дақиқа ба ӯ занг мезанад, дигар Ораз телефонашро намебардорад. Хонум Отамбекова таъкид мекунад, ки шавҳараш нияти ба Тоҷикистон рафтанро надошт ва борҳо таъкид карда буд, ки агар рӯзе дар Тоҷикистон пайдо шуд, бояд ҳама донад, ки ба хоҳиши худаш барнагаштааст.
Наздикони Рамзӣ Вазирбеков низ бар ин боваранд, ки ӯ ихтиёрӣ ба Тоҷикистон нарафтааст ва навори нашршуда аз онҳо саҳнасозии мақомот аст.
Онҳо дар гузашта чанд маротиба гуфта буданд, ки ҷонашон дар хатар аст ва агар рӯзе дар Тоҷикистон пайдо шуданд, бояд ҳама донанд, ки дуздида ва маҷбурӣ ба Тоҷикистон бурда шудаанд.
Ораз ва Рамзӣ Вазирбековҳо фаъолони бадахшонӣ ҳастанд, ки дар шабаҳои иҷтимоӣ аз нақзи ҳуқуқи башар дар ВМКБ ошкоро мегуфтанд. Онҳо шаҳрвандии Русияро доранд.
То ҳол мақомоти Русия дар бораи чӣ тавр шаҳрвандони ин кишвар дар Тоҷикистон пайдо шудаанд, чизе нагуфтаанд.
Ба назари огаҳони умур дуздида ва ба Тоҷикистон бурда шудани Рамзӣ ва Ораз Вазирбековҳо аз ҷониби ниҳодҳои интизомии кишвар идомаи саркӯби озодандешӣ дар Тоҷикистон мебошад ва онҳое, ки аз Ҳукумати Тоҷикистон интиқод мекунанд, бояд дарҳол Русияро тарк ва ба ҷоёи амнтаре паноҳ баранд, чун мисли Ораз ва Рамзӣ Вазиребковҳо, Иззат Амон, Амриддин Аловатшоев, Мақсуд Иброҳимов ва чандин фаъоли дигар ихроҷ ё дуздида ба Тоҷикистон бурда, барои солҳои тӯлонӣ равонаи зиндон мешаванд.
