Сухнагӯи Президенти Қирғизистон бахши қирғизии Радиои Озодиро дар робита ба ҳодисаҳои хунини 14-17-уми сентябри соли ҷорӣ “ба интишори ахбори дурӯғин” муттаҳам кард.
Имрӯз, 28-уми октябри соли 2022, Эрбол Султанбаев, сухангӯи Президенти Қирғизистон дар саҳфаи фейсбукии худ бахши қирғизии Радиои Озодиро ба “дурӯғпароканӣ” муттаҳам карда, гуфт, “дар бораи ҳодисаҳои Бодканд иттилооти бардурӯғ паҳн кардааст.“
Ба гуфтаи сухангӯи Президенти Қирғизистон “Вазорати фарҳанг, иттилоот, варзиш ва сиёсати ҷавонон ба ҳайси як мақоми ваколатдори давлатӣ дар соҳаи иттилоот тибқи қонунгузории Ҷумҳурии Қирғизистон тасмим гирифт, ки фаъолияти сомонаи “Azattyk Media” аз ҷониби (молики) хостинг боздошта шавад.”
Эрбол Султанбаев таъкид кард, ки ин сомона “дар бораи ҳодисаҳои рӯзи 14-17-уми сентябри 2022, дар вилояти Бодканд маълумоти бардурӯғ панҳ кардааст” бар ин хотир аз “провайдери хостинг вебсайтро барои ду моҳ боздоштааст.”
Гуфта мешавад, 26-уми октябри соли ҷорӣ Вазорати фарҳанг, иттилоот, варзиш ва сиёсати ҷавонони Қириғизистон эълон карда буд, ки бинобар паҳн кардани маълумоти бардурӯғ фаъолияти сомонаи бахши қирғизии Радиои Озодӣ барои ду моҳ қатъ карда шудааст.
Ба дунболи ин қарор хеле аз расонаҳои мустақил, рӯзноманигорон ва фаъолони ҷомеи шаҳрвандӣ дар ин кишвар онро фишор болои воситаҳои ахбори омма арзёбӣ карда, ҷамъе аз расонаҳои Қирғизистон ҳам субҳи имрӯз ба муддати се соат аз нашри ҳамагуна матолиби хабарӣ худдорӣ карда буданд.
