Тибқи фармони Президенти Тоҷикистон тирамоҳи соли ҷорӣ ба муддати як моҳ интихоботи машваратчиёни судҳо баргузор мешавад.
Дирӯз, 10-уми ноябри соли 2022 Президенти Тоҷикистон бо имзои як фармон амр кард, ки “интихоботи машваратчиёни халқии Суди Вилояти Мухтори Кӯҳистони Бадахшон, судҳои вилоят, шаҳри Душанбе, шаҳр ва ноҳияҳо аз 21 ноябр то 21 декабри соли 2022 гузаронида шавад.”
Дар ин фармон таъкид шудааст: “Раисони Вилояти Мухтори Кӯҳистони Бадахшон, вилоятҳо, шаҳри Душанбе, шаҳр ва ноҳияҳо дар муҳлати муқаррарнамудаи банди 1 ҳамин фармон гузаронидани интихоботи машваратчиёни халқиро мувофиқи Низомнома дар бораи машваратчиёни халқӣ таъмин намоянд.”
Гуфта мешавад, машвартчиёни халқии судҳо дар ҷаласаҳои парвандаҳое ширкат карда метавонанд, ки ба шакли боз баргузор шаванд ва дар ин бора ҳуқуқшиноси тоҷик Шокирҷон Ҳакимов ба “Спутник” гуфтааст: “машваратчиёни халқии судҳо бо назардошти таҷрибаи зиндагӣ, рафтору эътибор ва маҳалли зисти онҳо интихоб мешаванд ва шарт нест, ки онҳо дорои маълумоти олии ҳуқуқӣ бошанд.”