Владимир Путин, раисҷумҳури Русия фармонере имзо кард, ки ба афроди дорои шаҳрвандии хориҷӣ иҷозаи хидмат дар сафи Қувваҳои мусаллаҳи Русияро медиҳад. Ин фармони Путин дар
Ба ин фармон афроде шомил мешаванд, ки шаҳрвандӣ ё иқомаи як кишвар ё дорои санаде ҳастанд, ки ҳаққи иқомаи доимиро дар қаламрави кишвари дигар тайъид мекунад. Ҳамин тариқ, тибқи ин фармон афроди дорои шаҳрвандии хориҷӣ ба хидмати ҳарбӣ дар Русия аз рӯи даъват ва тибқи шартнома ҷалб мешаванд. Аммо бо шаҳрвандони хориҷие, ки маҳкум шудаанд, нисбаташон ҷазо пешбинӣ шудааст ё дар ҳолати тафтишот қарор доранд, шартнома баста намешавад. Таҳлилгарон бар ин назаранд, ки ин фармони Путин бештар дар баробари муҳоҷирони кишварҳои Осиёи Марказӣ татбиқ карда мешавад ва дар оянда ба эҳтимоли зиёд муҳоҷиронро аз хонаву кӯчаҳо ва ҳатто аз ҷойи корашон “облава” карда ба артиши Русия ҷалб мекунанд. Гуфта мешавад, акнун ҷавонони тоҷике, ки барои кор ба Русия рафтаанд ё аз “облава” шудан аз Тоҷикистон ба ин кишвар гурехтаанд боз бо “облава” рӯ ба рӯ мешаванд. Пештар низ хабарҳое нашр шуда буд, ки ҷавонони тоҷикро дар кӯчаҳо боздошт намуда, иҷборан барои хидмат дар артиши Русия ва иштирок дар ҷанги Украина бурдаанд. Чанде пеш дар тамрингоҳи Белгороди Русия ҳодисаи хунине рӯх дод, ки дар он ду шаҳрванди Тоҷикиистон ба қатли дасти кам 29 нафар аз сарбозону афсарон айбдор шуданд. Гуфта мешуд, ки онҳо бо хоҳиши худ ба артиш рафтаанд. Аммо наздикону пайвандонашон ин фарзияи эълоннамудаи мақомоти русро рад карда, гуфта буданд, ки ба он бовар надоранд.
Тоҷикон дар Русия ҳам “облава” мешаванд?
