24.9 C
Dushanbe

Ҳабси панҷ зодаи Тоҷикистон дар Русия

Додгоҳи низомии Екатеринбург панҷ зодаи Тоҷикистонро барои муҳлатҳои тӯлонӣ равонаи зиндон кард.

Мақомоти Русия ин панҷ зодаи Тоҷикистонро ба таъсис ва ширкат дар созмони террористӣ ва омодагӣ ба ҳамлаи террористӣ гунаҳкор медонад, аммо гумонбарон иттиҳомро рад кардаанд.

Додрас Сангинмурод Мусофиров ва Абӯбакр Сангчаровро дар ташкили гурӯҳи террористӣ ва ҷалби одамон ба он гунаҳкор дониста, Мусофировро ба 24 сол ва Сангчаровро, ки гуфта мешавад шаҳрвандии Русияро дорад, ба 25 соли зиндон маҳкум кардааст.

Се муттаҳами боқимонда дар ин парванда ба ширкат дар ин гурӯҳ гунаҳкор дониста шуда, додгоҳ Анваршо Авезовро, ки пеш аз ба муҳоҷирати меҳнатӣ рафтан дар Тоҷикистон пулис буд, ба 18 сол, Нуралӣ Дӯстовро ба 17 сол ва Шаҳриҷон Мусофировро барои 16 сол аз озодӣ маҳрум кард. Ҳар кадоми онҳо бояд 350 ҳазор рубли дигар низ ҷарима супоранд.

Ҳамаи онҳо панҷ соли аввалро дар зиндон, боқимондаи ҳукмашонро дар колонияи низомаш шадид сипарӣ хоҳанд кард.

Дар ҳамин ҳол вакили дифои ин шаҳрвандони Тоҷикистон Сергей Вискунов таъкид кардааст, ки ҳукм то ҳол эътибори қонунӣ нагирифтааст ва метавонанд аз болои он шикоят кунанд.

Ёдовар мешем, ки дар соли 2021 расонаҳо аз боздошти 15 муҳоҷири тоҷик дар ҷараёни як амалиёти мақомоти Русия хабар дода буданд. Пас аз се моҳ 10 нафари онҳо ихроҷ ва 5 нафари дигар боздошт шуданд.

Хадамоти амнияти федералии Русия (ФСБ) иддао карда буд, ки ин зодагони Тоҷикистон дар Екатеринбург бахши Толибонро эҷод намуда, дар Русия қасди ҳамлаҳои террористиро доштаанд.

Тибқи тафтишот, қароргоҳи ин гурӯҳ дар кӯчаи Свердлов 27-и Екатеринбург ҷойгир буда, аз он ҷо нерӯҳои амниятӣ мех, пораҳои сими барқ ​​ва се сӯзандорӯ пайдо кардаанд, ки гӯё аз онҳо маводи таркандаи худсохт сохтанд мехостаанд.

Боздоштшудаҳо ва пайванонашон иттиҳоми мақомоти русро сохта ва беасос номида, гуфта буданд, ки ба Русия барои кор рафта буданд. Инчунин онҳо гуфта буданд, ки боздоштшудаҳоро шиканҷа ва маҷбур кардаанд, ки ба ташкили гурӯҳи террористӣ иқрор шаванд.

Дар ҳоле ин зодагони Тоҷикистонро бо иттиҳоми ташкили бахши Толибон дар Русия зиндонӣ мекунанд, ки дар аввали моҳи июл дар нишасти сарони кишварҳои узви Созмони ҳамкориҳои Шанхай раисиҷумҳури Русия Владимир Путин “Толибон”-ро муттаҳиди Федератсияи Русия дар мубориза бо терроризм номид.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Кумаки 141 миллионии ИА ба Тоҷикистон

Иттиҳоди Аврупо эълон кардааст, ки зиёда аз 140 миллион евро ба Тоҷикистон кумак мекунад.

Рушди беш аз 8%-и иқтисоди Тоҷикистон

Гузоришгарони Бонки ҷаҳонӣ мегӯянд, рушди иқтисоди Тоҷикистон дар 16 моҳи ахир беш аз 8% тавсеа ёфтааст.

Баррасии ҳамкориҳои Тоҷикистон ва Иттиҳоди Аврупо

Мақомоти боломақоми Тоҷикистон ва Иттиҳоди Аврупо дар бораи ҳамкориҳои дирӯз ва имрӯзи худ гуфтугӯ карданд.

Шикояти мардум аз беобӣ дар Тоҷикистон

Бархе сокинони шаҳри Бохтар, маркази вилояти Хатлон мегӯянд, ки чор моҳ боз мардум аз беобӣ азият мекашанд ва касе дар вилоят ба доди онҳо намерасад.