Раҳбарияти Толибон барои ирсоли кумакҳои башардӯстона ба мардуми зарардида аз заминларзаҳои шадиди Ҳирот аз Тоҷикистон қадрдонӣ карданд.
Бино ба иттилои расонаҳо, Ҳофиз Зиё Аҳмад, муовини сухангӯи Вазорати корҳои хориҷии Афғонистон эълон кардааст, ки нахустин маҳмулаи кумакҳои башардӯстонаи Тоҷикистон ба зарардидаҳои заминларзаҳои ахир дар Ҳирот расонида шудааст.
Ба гуфтаи мувоини сухангӯи Вазорати корҳои хориҷии Толибон, ин кумакҳои башардӯстона дар ҳузури намояндаҳои сафорати Тоҷикистон дар Афғонистон ва дигар мақомоти расмӣ ба осебдидаҳои Ҳирот расонида шудааст.
Ёдовар мешавем, ки рӯзҳои 7-8-уми октябри соли ҷорӣ дар вилояти Ҳироти Афғонистон заминларзаҳои пайдарпайи шадиде қисмати шимолу ғарбии Афғонистонро такон дода буданд ва дар натиҷаи ин заминларзаҳо, бар асоси оморҳои расмӣ, ҳудуди 5 ҳазор нафар, вале тибқи оморҳои ғайрирасмӣ наздик ба 12 ҳазор нафар кушта ва захмӣ гардида буд. Инчунин ҳазорҳо нафари дигар зарар дида буданд.
18-уми октябри соли ҷорӣ Тоҷикистон барои зарардиҳои Афғонистон дар ин заминларзаҳо эълон карда буд, ки ҳудуди 3 ҳазору 300 тонна кумакҳои башардӯстонае иборат аз 200 тонна орд, 50 тонна шакар, 20 ҳазор литр равғани наботӣ, 20 тонна ҷав, 20 тонна нахуд, 20 тонна биринҷ, масолеҳи сохтмонӣ ва ғайра дар 130 мошини боркаш фиристодааст.
Ирсоли ин кумакҳои башардӯстонаи Тоҷикистон бо истиқболи гармӣ Толибон, ки раҳбарияти феълии Афғонистон дониста мешаванд, рӯбарӯ шуд. Мақомоти Толибон дар Афғонистон барои ирсоли ин кумакҳои башардӯстона аз Тоҷикистон қадрдонӣ карданд.
Додгоҳи Олии Тоҷикистон Ҳаркати Толибони Афғонистонро як созмони террористӣ медонад ва ҳаргуна фаъолияти онро дар ҳудуди Тоҷикистон манъ кардааст. Мақомоти кишвар дар тӯли беш аз ду даҳсолаи ахир бо иттиҳомӣ пайравӣ ва ҳамдастӣ бо Толибон садҳо нафар аз тоҷикистониҳоро боздошт ва ба муддатҳои тӯлонӣ зиндонӣ кардаанд.
