Афғонистон пули 4 моҳаи барқашро пешпардохт кард

Ширкати барқрасони “Брешно”-и Афғонистон ба ширкати “Барқи тоҷик” чормоҳа маблағи барқро пешпардохт кардааст. Дар баробари ин масъулони ширкати “Барқи тоҷик” аз масъулони “Брешно” барои пешпардохти барқ изҳори сипос намудааст. Дар ин бора Sputnik хабар дод.

“Мирзо Исмоилзода, раиси ширкати “Барқи тоҷик” аз ҳамтои афғонаш Аҳмад Довуд Нарзай ва тими ӯ барои ҳамкориҳои муштарак дар воридоти барқ аз Тоҷикистон ба Афғонистон ва пули пешпардохти чаҳор моҳ – январ, феврал, март ва апрел изҳори ташаккур кардааст. Ин нома дар ихтиёри "Sputnik-и Тоҷикистон қарор дорад" - омадааст дар хабар.

Ширкати “Брешно”-и Афғонистон дар баробари пешпардохти чормоҳа, ки қаблан дар моҳи декабр бо ҷониби Тоҷикистон ба тавофуқ расида буданд, хостааст, ки барои моҳҳои баъдӣ қиммати барқро поин бибарад. Зеро ба гуфтаи масъулони “Брешно” барқ ба онҳо каме гарон фурӯхта мешавад.

Дар бораи нархномае, ки ширкати “Барқи тоҷик” ба Афғонистон мешуфрӯшад, расман чизе гуфта нашудааст, аммо бино ба навиштаи "Sputnik", ки аз қавли манобеаш овардааст, Афғонистон 1 квт/соат барқро ба 4,1 сент аз Тоҷикистон харидорӣ мекунад.

Барқе, ки аз Тоҷикистон ба Афғонистон интиқол меёбад, то моҳи июли соли гузашта беш аз 10 шаҳру вилоятҳои ин кишвари ҳамсояро таъмин мекард, аммо баъд аз коҳиш ёфтани интиқоли он ҳоло вилоятҳои Қундуз, Тахор ва Бағлонро таъмин мекунад.

Байни Тоҷикистону Афғонистон барои хариду фурӯши барқ аз 20 июни соли 2008 созишнома ба имзо расонидааст.

Шуруъ аз охирҳои моҳи июли соли гузашта “Барқи тоҷик” интиқоли нерӯи барқро ба Афғонистон коҳиш дод ва сабаби онро дар кам гардидани мизони оби обанбори “Норак” гуфт.

Аз он ба баъд Афғонистон талош кард барқро аз кашварҳои Узбекистону Туркманистон ворид кунад ва ҳамчунин тавлиди барқи дохилиро низ тақвият бахшад. Аммо бо далели камобӣ натавонист талаботи дохилиашро таъмин кунад ва ҳоло ин кишвар аз камбуди барқ танқисӣ мекашанд.