Рӯзи 28-уми январ нерӯҳои Русия ба шаҳри Киев ва чанд минтақаи дигари Украина ҳамлаи нав анҷом доданд. Ба иттилои манобеи украиниӣ, ҳамлаҳо асосан шабона сурат гирифта, дар онҳо аз мушакҳо ва паҳподҳо истифода шудааст.
Гуфта мешавад, дар пайи ин ҳамлаҳо дар Киев ва атрофи он чанд бинои истиқоматӣ ва иншооти инфрасохторӣ осеб дидаанд. Бар асари зарбаҳо дар баъзе маҳаллаҳо барқу гармидиҳӣ қатъ шуда, сокинон бо мушкил рӯ ба рӯ шудаанд. Мақомоти Украина хабар додаанд, ки дар натиҷаи ҳамлаҳо чанд ғайринизомӣ захмӣ шуда, талафоти ҷонӣ низ ба қайд гирифта шудааст.
Манобеи расмии Украина мегӯянд, ҳамлаҳои рӯзи 28-уми январ идомаи зарбаҳои пайдарпайи Русия ба зербиноҳои шаҳрвандӣ ва энергетикии кишвар аст, ки ҳадафаш фишор ба аҳолии осоишта мебошад. Президенти Украина Владимир Зеленский ҳушдор додааст, ки Русия метавонад ҳамлаҳои навбатиро идома диҳад ва вазъ ҳамоно ноором боқӣ мемонад.
Ин ҳамлаҳо дар ҳоле рух медиҳанд, ки ҷанги Русия алайҳи Украина вориди марҳилаи тӯлонӣ шуда, ҳамарӯза ҷони ғайринизомиёнро зери хатар қарор медиҳад.
Рӯзи 27-уми январ низ Русия бо паҳподҳо ба як қатори мусофирбар дар вилояти Харков ҳамла кард. Дар ин ҳодиса дастикам панҷ нафар кушта шуданд. Мақомоти Украина мегӯянд, нерӯҳои Русия бо се паҳподи «Шаҳид» ба назди қаторе, ки дар он 291 мусофир, аз ҷумла кӯдакон буданд, зарба заданд. Президент Владимир Зеленский ин ҳамларо амали террористӣ номид ва шадидан маҳкум кард.
