Агар бебарқу беоб ҳам бошӣ, хонаат торику хунук ҳам бошад, шукр бигӯ

Шукр мегӯем, аммо фикр намекунед, ки хонаҳо хунуку кӯдакон майдаанд? Ин садоест, ки дар натиҷаи талқини аз ҳад зиёди шукр аз дарди дили мардуми тоҷик шаҳодат медиҳад.

Рӯзноманигори тоҷик Мижгона Ҳалимова дар саҳифаи фейсбукиаш аз набудани барқу газ дар ин фасли сармо шикоят намуда, менависад, ки каме борон бориду барқро хомӯш карданд, хонаҳо хунуканду кӯдакон бояд мактаб раванд, аммо касе барои ҳалли ин мушкилоти ҷиддӣ чорае намеандешад.

Ҳалимова менависад, ки барои сабаби бебарқиро фаҳмидан ба Шабакаи барқи шаҳри Ваҳдат борҳо занг задааст, аммо касе ҳозир нашудааст, ки ба зангҳояш посух гӯяд.

Ӯ навишт: “Ҳамин шаб камтарак борон борид, соати 21:30 шукр қувваи барқро хомӯш карданд ва шукр то ҳозир нест.

Телефонам як қатра "заряд" дошт аз занг задани Шабакаи барқи шаҳри Ваҳдат, тамом шуду вале касе ҷавоб надод.

Шукру аммо фикр намекунед хонаҳо хунуку кӯдакон майда. Каме ҳам бошад аз Худо тарсед, ҳозир бояд кӯдакон мактаб раванд, газ кӯ надорем, ҳадди ақал қувваи барқро диҳед охир.”

Ҳалимова сабаби шукргӯияшро шарҳ дода мегӯяд, ки ҳар боре дар бораи мушкилот чиза нависам, “ба ман мегӯянд, шукрона кун, ина кардам”.

Солҳост мардуми тоҷик дар фасли сармо аз бебарқӣ ранҷ мебаранд.Шурӯъ аз моҳи июли соли 2018 чархаи аввалини нерӯгоҳи “Роғун” сохта ва ба истифода дода шуд. Он замон худи Эмомалӣ Раҳмон гуфта буд, ки дигар лимити барқ ба охир расидааст ва мардум бебарқиро ба хотираҳо хоҳанд супурд.

Аммо сокинони кишвар мегӯянд, имсол бебарқӣ аз солҳои пешин ҳам бадтар шудааст. Дар баъзе манотиқи кишвар дар як шабонарӯз як ё ду соат барқ доранду тамом.