Ҳамкории тиҷоратии ду ҳамсояи Тоҷикистон ба марҳилаи нав ворид мешавад

Дар ҳоле, ки мақомоти Тоҷикистон мавқеъи хасмона алайҳи Толибон гирифтаанд, мақомоти кишвари ҳамсояи Узбекистон бо суръат ҳамкорӣ бо ҳукумати нави Афғонистонро вусъат мебахшанд. Рӯзҳои гузашта ҳамкории ду кишвари ҳамсояи Тоҷикистон ба марҳалаи нав ворид шуд. 

Дар Кобул Форуми бузурги тиҷоратии Афғонистону Узбекистон баргузор шуд, ки дар он ду тараф 22 созишномаи ҳамкориро ба маблағи 200 миллион доллар ба имзо расониданд. Ба гуфтаи мақомоти ҳукумати Толибон, ин нишасти иқтисодӣ роҳро барои расонидани ҳаҷми додустиди дуҷониба аз 2 миллиарди кунунӣ ба 5 миллиард доллар ҳамвор мекунад.

Барои ширкат дар ин форум (ки 26 июл оғоз ёфт) аз Узбекистон зери раҳбарии муовини нахуствазир Ҷамшед Хоҷаев беш аз 300 намоянда ва тоҷир ба Кобул омаданд. Дар умум дар ҳамоиш қариб 400 соҳибкори афғон ва садҳо тоҷири узбек сари як миз нишастанд.

Яке аз созишномаҳои бузурги имзошуда дар бахши энергетика — қарордоди 50 миллиондоллара миёни ширкатҳои ду кишвар барои воридоти гази моеъ. Ин иқдом бояд камбуди сузишворӣ дар бозорҳои Афғонистонро ба таври оҷил бартараф кунад.

Агар қаблан Узбекистон 10 ҳазор тонна пахтаи Афғонистонро ба таври озмоишӣ харида бошад, акнун ӯҳдадор шудааст, ки боз 100 ҳазор тоннаи дигар ворид кунад. Узбекистон бо вуҷуди ин ки бузургтарин истеҳсолкунандаи пахта дар минтақа аст, на танҳо онро пурра коркард мекунад, балки аз кишварҳои ҳамсоя низ (аз ҷумла Тоҷикистон) ворид месозад.

Ҳамзамон созишномаҳо дар мавриди содироти меваи хушку сангҳои қиматбаҳои Афғонистон ва воридоти доруву масолеҳи сохтмонӣ баста шуданд. Узбекситон бинобар доштани боғҳои зиёди мевагӣ ва содироти густардаи хушкмева, тақрибан ба хушкмеваи Афғонистон ниёз надорад. Зоҳиран ин кишвар мехоҳад бо коркарди хушкмеваҳои Афғонистон онро бозсодирот (рэекспорт) намояд.  

Ҳар ду тараф дар бахшҳои коркарди конҳо, кишоварзӣ ва дорусозӣ ба тавофуқи сармоягузории муштарак расиданд. Интизор меравад, ки роҳандозии ин лоиҳаҳо барои даҳҳо ҳазор сокини Афғонистон ҷойи корӣ эҷод кунад.