Рӯзҳои охир сокинони Эрон на танҳо дар дохили кишвар, балки дар гӯшаҳои гуногуни ҷаҳон ба баргузории роҳпаймоиҳои эътирозӣ алайҳи ҳукумати Эрон идома медиҳанд.
Рӯзи 11-уми январ ҳангоми баргузории тазоҳурот дар минтақаи Westwood-и шаҳри Лос-Анҷелес, ки дар он ҳазорҳо нафар иштирок доштанд, як ҳодисаи пуртаниш рух дод. Ба иттилои шоҳидон, як мошини боркаш ба самти эътирозгарон ҳаракат кард, ки боиси хашму изтироби ҷамъомадагон гардид.
Гуфта мешавад, ронандаи мошин бо шиорҳое чун “No Shah” (зидди бозгашти шоҳи пешин), “No Regime” (зидди режими ҳокими кунунӣ дар Эрон), “USA: Don’t Repeat 1953” (ишора ба рӯйдодҳои соли 1953 бо дахолати ИМА ва Бритониё) ва “No Mullah” (мухолифат бо ҳукумати рӯҳониён) мавқеи худро баён кардааст.
Пас аз ин ҳодиса, бархе аз эътирозгарон талош карданд, ронандаро боздоранд ва ӯро маҷбур созанд мошинро тарк кунад,чанде аз онҳо ба сӯйи мошин давида, ронандаро бо мушт ва чӯб задаанд ва тирезаҳои мошинро шикастаанд.
Пулис ба ҷойи ҳодиса расида, ронандаро боздошт кардааст. Ба иттилои расмӣ, дар натиҷаи ин даргирӣ як нафар ҷароҳат бардоштааст. Мақомот ҷузъиёти бештар дар бораи вазъи саломатии ҷароҳатдида ва ангезаҳои дақиқи ҳодисаро то ҳол эълон накардаанд.
