Баъзе аз сенаторони Амрико аз Ҳукумати Тоҷикистон озодии фаврии зиндониёни сиёсиро талаб карданд.
Нома ва матни суханронии сенаторони армикоие, ки ин талабро аз Тоҷикистон кардаанд, рӯзи ҷумъа, 13-уми декабр ба дасти Azda TV расид.
Дик Дурбин ва Питер Уэлч намояндагони аксарияти Сенои Амрико аз Ҳукумати Тоҷикистон хостаанд, ки фавран ва бидуни шарт зиндониёни сиёсиро озод кунанд. Онҳо дар суханронии худ таъкид мекунанд, ки ҳамаи ин зиндониёни сиёсӣ аз арзишҳои демократӣ ва озодиҳои сиёсӣ ҳимоят кардаанд.
Суханронии ин ду намояндаи Сенои Амрико рӯзи 11-уми декабр дар толори Сено гузаштааст. Онҳо бо шумули зиндониёни сиёсии тоҷик, инчунин аз кишварҳои Арабистони Саудӣ, Эритерия ва Ветнам низ хостанд, ки зиндониёни сиёсиашонро бидуни қайду шарте озод кунанд.
Сенатор Дурбин дар суҳбаташ чунин мегӯяд: “Ман ҳар аз чанд гоҳе дар Сено (Сенат) масъалаи зиндониёни сиёсиро, ки дар саросари ҷаҳон зиндониянд ба миён мегузорам. Шояд шумо фикр кунед, ки чаро ман ба такрор дар бораи онҳо суҳбат мекуна? Ман дарк кардаам, ки беадолатии воқеӣ вуҷуд дорад. Ҳамчунин фаҳмидам, ки ҳаргоҳе аз минбари Сено дар бораи зиндониёни сиёсӣ суҳбат мекунам, баъзе аз мардум мешунаванд ва боиси тағйир дар сарнавишти онҳо мегардад.”, — мегӯяд сенатор Дик Дурбин.
Дурбин ҳангми суханронияш дар мавриди зиндониёни сиёсии тоҷик аз вакили дифоъ Бузургмеҳр Ёров ва собиқ муовини раиси Ҳизби сотсиал-демократи Тоҷикистон Маҳмурод Одинаев ном бурд. Ӯ гуфт, Ёров танҳо ба хотири намояндагӣ ва ҳимоят аз ҳуқуқи мухолифони қонунии Тоҷикистон дар додгоҳ барои 28 сол маҳкум ба зиндон шудааст.
Ёдовар мешавем, ки ин бори авал нест сенаторони амрикоӣ хостори озодии зиндониёни сиёсӣ дар Тоҷикистон мешаванд. Соли 2020 низ 12 сенатори амрикои бо фирисодани номае ба Эмомалӣ Раҳмон хостори озодии зиндониёни сиёсӣ гашта буданд.
Ҳамзамон дар чанд соли ахир парлумони Аврупо 3 катънома барои озодии зиндониёни сиёсии тоҷик содир кардааст. Созмони Милали Муттаҳид бошад, парвандаи раҳбарони ҲНИТ, собиқ раиси Ҳизби демократ Маҳмадрузи Искандаров, раиси Ҳизби Тоҷикистони Нав Зайд Саидов, раҳбари гурӯҳи Ҷанон барои Тоҷикистон Мақсуд Иброҳимов, вакилони мудофеъ ва рӯзноманигорони зиндониро баррасӣ ва боздошти онҳоро ғвйриқонунӣ дониста, аз Ҳукумати Тоҷикистон хостанд фавран онҳоро озод кунад.
Аммо Ҳукумати Тоҷикистон на танҳо ба ин дархостҳои созмонҳо ва кишварҳои ғарбӣ таваҷуҳ намекунад, балки саркӯбҳоро васеътар идома медиҳад. Аз ҷумлаи саркӯбҳои доманадор Тоҷикистон ин аст, ки дар давоми соли 2024 раис ва муовини Ҳизби демократи Тоҷикистон Саидҷаъфар Усмонзода ва Аҳмадшоҳ Комилзода, муовини раиси Ҳизби сотсиал-демократи Тоҷикистон Шокироҷон Ҳакимов, собики вазири хориҷии кишвар Ҳамрохон Зарифӣ ва собик раиси Шӯрои Олӣ Акбаршоҳ Искандаров ва дигаронро боздошт карда, ба иттиҳоми “табаддулоти давлатӣ” парванда боз кард ва ҳоло муҳокимаҳои додгоҳии онҳо пушти дарҳои баста идома дорад ва дар бораи иттиҳомоти онҳо мақомот изҳори назар намекунанд.
Инчунин боздошт ва истирдоди раҳбари Ҳаракати сиёсии “Гурҳи 24” Суҳроби Зафар ва фаъоли ин гурӯҳ Насимҷон Шарипов аз Истанбули Туркия ба Тоҷикистон, ки яке ба 30 сол ва дуюмӣ ба 20 сол аз озодӣ маҳрум шуданд, далели ин саркӯбҳои густардаи Эмомалӣ Раҳмон алайҳи мухолифони сиёсияш аст.
