Ҷасади Шуҳрат Исматуллоев, муовини раиси “Ориёнбок” дар шаҳри Панҷакент пайдо шудааст. Дар ин бора мақомоти Додситонии кулли кишвар хабар доданд.
Имрӯз, 15-август Юсуф Раҳмон, Додситони кулли Тоҷикистон зимни нишасти матбуотии ниҳодаш ба расонаҳо иттилоъ дод, ки ҷасади Исматуллоев ду рӯз пеш аз ҳудуди шаҳри Панҷакент пайдо шудааст. Ҷасад бо гузашти қариб ду моҳ шинохта нашудааст, аммо пас аз ташхиси дандонҳояш муайян шуда, ки ҷасади ӯст.
Юсуф Раҳмон дар ин нишасти матбуотӣ ҳамчунин илова кард, ки дар ҷинояти рабудан ва куштани муовини раиси “Ориёнбонк” дасти кам 16 нафар даст дорад ва то кунун 13 нафари онҳо боздошт шудааст, аммо 3 нафари дигар дар ҷустуҷӯ қарор дорад.
Гуфта мешавад, гумонбарони асосӣ дар қатли Шуҳрат Исматуллоев баъзе аз собиқ кормандони Вазорати корҳои дохилии Тоҷикистон аст. Ва худи Рамазон Раҳимзода вазири ин ниҳод дар нишасти матбуотияш низ тасдиқ кард, ки бархе собиқ кормандонаш, ки аз кор ронда шуда буданд, дар ҷинояти мазкур иштироки фаъол доштаанд.
Ёдовар мешавем, ки шоми 23-уми июни соли ҷорӣ Шуҳрат Исматуллоев, муовини аввали Ҳасан Асадуллозода, раиси “Ориёнбонк” дар шаҳри Душанб рабуда шуда ва ба сӯи ноҳияи Айнии вилояти Суғд бурда шуд.
Дар аввал мақомоти Тоҷикистон аз боздошти 4 нафар собиқ афсарони ниҳодҳои қудратӣ хабар доданд, ки дар рабудани Исматуллоев гумонбар дониста мешуданд. Он замон гуфта мешуд, дар ҷинояти мазкур нафарони дигаре ҳам иштирок доранд, вале касе аз онҳо ном намебурд.
30-уми июни соли ҷорӣ мақомоти Молдова аз захмӣ шудани як шаҳрванди Тоҷикистон дар Фурӯдгоҳи Кишинёви ин кишвар хабар доданд. Баъдтар маълум гашт, ки ӯ Рустма Ашӯров, собиқ корманди ВКД Тоҷикистон будааст.
Дар як наворе, ки 7-уми июли соли ҷорӣ ба шабакаҳо роҳ ёфт, худи ӯ пеш аз захмӣ шуданаш тавассути маъмурони интизомии фурӯдгоҳ бо модараш видоъ мекунад.
Рустам Ашӯров дар ин навор ба модараш мегӯяд, ки ду маъмури амниятии фурӯдгоҳро куштааст. Ва ҳатто ҷасади хобидаи онҳоро низ нишон медиҳад.
Дар ин суҳбат Ашӯров иқрор мешавад, ки Шуҳрат Исматуллоев, муовини раиси “Ориёнбок”-ро ӯ ҳамроҳи як нафари дигар бо номи Дилшод СБ куштаанд. Вале ӯ мегӯяд, дар қатли Исматуллоев мустақим даст надорад.
Бино ба гуфтаи собиқ милисаи тоҷик, Дилшод чанде пеш ба ӯ гуфта будааст, ки “як одам ҳудуди 200 миллион доллар “Биткоин” дорад, биё ӯро медуздему “Биткоин”-ҳояшро мегирем ва худашро ҷавоб медиҳем.” Дар идома афзуд, Исматуллоев бо сабаби шиканҷаи зиёди Дилшод кушта шуд.
То ҳанӯз мақомот Дилшоди Саидмуродов, маъруф ба Дилшод СБ-ро пайдо ва боздошт накардаанд. Гуфта мешавад, ӯ пас аз анҷоми ин кор тариқи фурӯдгоҳи Душанбе кишварро тарк кардааст.
