Як ҷавони кӯҳистонии Тоҷикистон шоми дирӯз сафири Арабистони Саудӣ дар Тоҷикистон ва ҳайати ҳамроҳонашро дар роҳ ифтор дод ва ин зиёфати ӯ қобили таҳсин қарор гирифт.
Шоми 28-уми март, рӯзноманигори Арабистони Саудӣ Файсал Ал-Абдулкарим бо нашри наворе аз Тоҷикистон гуфт, “Худованд ризқатро то пеши дарат кашонда мерасонад…”
Ин рӯзноманигор, ки барои тақсими кумакҳои кишвараш ба зарардидаҳои заминҷунбиҳои ахир дар Тоҷикстон ҳамроҳ бо сафири Арабистони Саудӣ, яке аз раҳбарони Маркази имдод ва кумакҳои башардӯстонаи шоҳ Салмон ва дигар ҳамроҳонаш ба манотиқи зардида мерафтанд, бегоҳ, вақти ифтор яке аз сокинони кишварамон бо номи Асадуллоҳ ҳамаи онҳоро сари роҳ ба ифтор даъват мекунад.
Файсал Ал-Абдулкарим мегӯяд, ки ҳеч кудоме аз онҳоро ин ҷавони тоҷик намешинохт, вале чун вақти ифтор буд, Асадуллоҳ ҳамаи ин мусофиронро барои савоб ба ифтор даъват кард ва худи Асадуллоҳ низ аз он ки даъвати ӯро пазируфтанд, бо хушҳолӣ аз онҳо сипосгузорӣ мекунад.
Дар ин миён, Валид бин Абдурраҳмон Аррушайдон, раҳбари ҳайъати Маркази имдод ва кумакҳои башардӯстонаи шоҳ Салмон дар Тоҷикистон ба тарҷумон мегӯяд, ки аз Асадуллоҳ пурсад, ки ягон бор ба Арабистони Саудӣ рафтаву Ҳаҷ кардааст? Асадуллоҳ мегӯяд, не, нарафтааст!
Дубора ба тарҷумон мегӯяд, ки пурсад, қасди сафар ба Арабистони Саудӣ ва Умра карданро дорад? Асадуллоҳ ҳам бо хушҳолӣ мегӯяд, ки хеле зиёд хоҳиши рафтанро дорад.
Аррушайдон бори дигар ба сафири Арабистони Саудӣ дар Тоҷикистон рӯ оварда мепурсад, ки аз нигоҳи қонунӣ имкони фароҳам овардани шароит барои рафтани Асадуллоҳ ба Умра вуҷуд дорад?
Сафири Арбистони Саудӣ ҳамроҳ бо ҳайъати Маркази имдод ва кумакҳои башардӯстонаи шоҳ Салмон дар Тоҷикистон
Сафир ҳам дар ҷавоб мегӯяд, ки бо камоли сурур ва хушҳолӣ омодааст, ки шароити таҳияи раводидро барои ин ҷавони саховатманди тоҷик фароҳам кунад ва Валид бин Абдурраҳмон Аррушайдон, раҳбари ҳайати Маркази кумакҳои Малик Салмон ҳам мегӯяд, ки хароҷоти роҳ ва иқомат дар Арабистонро ба уҳда мегирад.
Дар охир, Асадуллоҳ, ин ҷавон саховатманди тоҷик мегӯяд, ки агар ин имкон вуҷуд дошта дошта бошад, ки дар ин сафар ҳамсарашро ҳам бо худ бибарад, хеле хушҳол мешавад ва меҳмонон ҳам бо хушҳолӣ қабул карда мегӯянд, ки ин шоа Аллоҳ ба наздикӣ шароитро барои вай ва ҳамсараш фароҳам мекунанд, то ба Арабистони Саудӣ рафта, якҷо умра кунанд.
