32.9 C
Dushanbe

Ба имзо расидани қарордоди нав барои нақби “Истиқлол” байни Тоҷикистону Эрон

Дар Душанбе байни Вазорати нақлиёти Тоҷикистон ва ширкати “Фароб”-и Эрон, қарордоди иҷрои марҳилаи дуввуми лоиҳаи нақби “Истиқлол” ба имзо расид.

Қарордод бо ҳузури вазири нақлиёти Тоҷикистон ва сафири Эрон дар Душанбе ва ҳамчунин раиси ширкати “Фароб” анҷом ёфтааст.

“Азияи – Плюс” аз манбааш аз сафорати Эрон дар Душанбе навиштааст, ки қарор аст дар марҳилаи дуввум ширкати “Фароб”-и Ҷумҳурии исломии Эрон корҳои марбут ба равшанидиҳӣ, ҳавокашӣ, оташнишонӣ, насби дурбинҳои назоратиро ба анҷом бирасонад.

Ҳамчунин зикр гардида, ки вазири нақлиёти Тоҷикистон Азим Иброҳим, таъхири кори нақби “Истиқлол”-ро ба эҷоди баъзе мушкилиҳо рабт дода, иброз доштааст, ки “Тоҷикистону Эрон ду кишвари дӯст, ҳамзабон, ҳамфарҳанг ва дорои таърихи муштараканд ва кишвари Эрон дар татбиқи бисёре аз лоиҳаҳо иқтисодӣ дар Тоҷикистон, аз қабили сохтмони нерӯгоҳи барқи обии “Сангтуда 2” ва нақби “Истиқлол” ширкат намудааст”.

Азим Иброҳим иброз дошт, ки “марҳилаи дуввуми лоиҳаи нақби “Истиқлол” то ҷашни 30 солагии истиқлолияти кишвар ба поён мерасад”.

Муҳаммадтақии Собирӣ сафири Ҷумҳурии исломии Эрон гуфтааст, ки “марҳилаи дуввуми ин лоиҳа бо муваффақият ба анҷом хоҳад расид ва гоми дигаре ба сӯи рушду тараққии Тоҷикистон бардошта хоҳад шуд”.

Вале аз ҷониби мақомоти Тоҷикистон дар анҷоми корҳои сохтмонии марҳилаи дуввуми бунёди нақби “Истиқлол” чӣ миқдор маблағ масраф мешавад, чизе гуфта нашудааст.

Раиси ширкати “Фароб” дар ин замина гуфтааст, ки “саҳми Тоҷикистону Эрон дар ин лоиҳа 50 дарсадӣ буда ва агар ҳарду тараф тааҳҳудоти худро бамавқеъ иҷро кунанд, то ҷашни 30 солагии истиқлоли Тоҷикистон он ба истифода дода хоҳад шуд”.

Нақби “Истиқлол”- соли 2006 бо ҳузури Маҳмуди Аҳмадинажод, раисҷумҳури собиқи Эрон ва Эмомалӣ Раҳмон, раисҷумҳури Тоҷикистон ба истифода дода шуда буд, ки то ба имрӯз ба таври нопурра боқи мондааст, ҳатто ин нақб то чанд сол дар зери об қарор дошт ва системаи ҳавотозакунии он то ба имрӯз фаъол нест.

Бино ба иттилооти интишор гардида, гуфта мешавад, ки ин нақб бо харҷи бештар аз 60 миллион доллар ва дар муддати 3 сол аз ҷониби давлати Эрон сохта шуд.

Аз руйи маълумоти расман тасдиқ нагардида, яке аз сабабҳои тӯл кашинаи ин нақб ва нотамом гузоштани он, аз байн гумшудани маблағҳои ҷудогардида аз ҷониби Эрон гуфта мешавад, ки мақомоти Тоҷикистон онро ба куҷо масраф намудаанд, то ҳол суолест беҷавоб.

Ҳамчунин гуфта мешавад, як қисме аз мушкилоти дигари он ба қазияи Бобак Занҷонӣ – милардери эронӣ рабт дорад. Номбурда қабл аз дастгир шудан дар чандин бахшҳои кишвар сармоягузорӣ намуда буд. Ӯро аз наздикртарин дӯстони Ҷамолиддин Нуралиев, домоди Эмомалӣ Раҳмон медонанд.

Коршиносон яке аз сабабҳои тира гаштани равобити Эрону Тоҷикистонро ба он рабт медиҳанд, ки Ҷамолиддин Нуралиев маблағҳои интиқол намудаи Занҷонӣ аз худ намудааст.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Ҳунарманди маъруфи театру синамои тоҷик даргузашт

Рӯзи 27-уми апрели соли ҷорӣ ҳунарманди шинохтаи театру синамо Асланшоҳ Раҳматуллоев дар умри 71-солагӣ аз олам чашм пӯшид.

Кушта шудани 12 нафар дар пайи ҳамлаи Русия ба пойтахти Украина

Шаби 24-уми апрели соли 2025 пойтахти Украина, шаҳри Киев ҳадафи ҳамлаи шадиди низомии Русия қарор гирифт.

Раҳмонов боз дар бораи ҷазо ва маҳдудиятҳо гуфт

Эмомалӣ Раҳмон бори дигар аз ҷазо барои истифодаи "ғайриқонунии нерӯи барқ" ва "напардохтани пули он" гуфт.

Покистон дар камтар аз як моҳ 120 ҳазор афғонро ихроҷ кард

Дар камтар аз як моҳ давлати Покистон ҳудуди 120 ҳазор шаҳрванди Афғонистонро ихроҷ кард.