Эмомалӣ Раҳмон, раисҷумҳури Тоҷикистон рӯзи 21-уми январи соли ҷорӣ ба давлати Қатар сафар кард. Зимни ин сафар ва мулоқот бо мақомҳои қатарӣ, чанд санади наве низ ба имзо расидаст.
Хадамоти Президенти Тоҷикистон мегӯяд, дар ин сафар Эмомалиро ёваронаш дар умури равобити хориҷӣ, иқтисодӣ, вазирони корҳои хориҷӣ, рушди иқтисод ва савдо, саноат ва технологияҳои нав, энергетика ва захираҳои об, меҳнат, муҳоҷират ва шуғли аҳолӣ, фарҳанг, молия, кишоварзӣ ҳамроҳӣ кардаанд.
Инчунин раисони Кумитаи давлатии сармоягузорӣ ва идораи амволи давлатӣ, Бонки миллӣ, Кумитаи ҳолатҳои фавқулодда ва мудофиаи гражданӣ ва дигарон низ дар ин сафар шомил буданд.
Ба гуфтаи коршиносон, аз ҳайати ҳамроҳони Эмомалӣ Раҳмон ҳадафи сафари ӯ ба Қатарро метавон маълум кард, ки он маҳз ба хотири ҷалби сармояи бузурги Қатар ба Тоҷикистон ва инчунин ҷалби таваҷҷуҳи кишварҳои Халиҷи Форс барои сармоягузорӣ дар лоиҳаҳои бузурги кишвар мебошад.
Эмомалӣ Раҳмон пас аз мулоқот бо Амири Қатар, Шайх Тамим бин Ҳамад Оли Сонӣ, инчунин дар чорчӯби Форуми соҳибкорони Точикистону Қатар бо иштироки вазири савдо ва саноати ин кишвар Шайх Муҳаммад бин Ҳамад ва дар алоҳидагӣ бо мудири бахши сармоягузории ширкати “Диёри Қатар” Аҳмад Муҳаммад Тайиб бин Қосим Оли Сонӣ ва дигар масъулони иқтисодӣ ва тиҷоратии он мулоқот кард.
Гуфта мешавад, яке аз масоили муҳиме, ки дар мулоқот бо мудири бахши сармоягузории ширкати “Диёри Қатар” баррасӣ шудааст, ин зарурати бунёди шаҳраки нави дигар дар шаҳри Душанбе мебошад.
Ба иттилои расонаҳои ҳукуматии Тоҷикистон, пас аз анҷоми мулоқоти дуҷониба бо иштироки раҳбарони ду кишвар 9 санади нави ҳамкорӣ ба имзо расид, аз ҷумла:
— Ёддошти тафоҳум дар бораи ҳамкорӣ дар соҳаи идоракунии ҳолатҳои фавқулода ва офатҳои табиӣ байни Кумитаи ҳолатҳои фавқдулода ва мудофиаи граждании назди Ҳукумати Ҷумҳурии Тоҷикистон ва Сарраёсати мудофиаи граждании Вазорати корҳои дохилии Давлати Қатар;
— Барномаи аввалини амал дар соҳаи таҳсилоти олӣ ва тадқиқоти илмӣ тибқи Созишнома дар бораи ҳамкорӣ дар соҳаи маориф, таҳсилоти олӣ ва тадқиқоти илмӣ барои солҳои таҳсилӣ (2024/2025-2025/2026-2026/2027).
— Барномаи ҳамкорӣ байни Вазорати корҳои хориҷии Ҷумҳурии Тоҷикистон ва Вазорати корҳои хориҷии Давлати Қатар барои солҳои 2024-2026;
— Ёддошти тафоҳум оид ба ҳамкорӣ дар соҳаи рушди осорхона байни Муассисаи давлатии «Осорхонаи миллӣ»-и Дастгоҳи иҷроияи Президенти Ҷумҳурии Тоҷикистон ва Идораи осорхонаҳои Давлати Қатар;
— Изҳороти муштарак дар бораи рушди ҳамкории фарҳангӣ байни Вазорати фарҳанги Ҷумҳурии Тоҷикистон ва Вазорати фарҳанги Давлати Қатар;
— Ёддошти тафоҳум байни Департаменти мониторинги молиявии назди Бонки миллии Тоҷикистон ва Воҳиди молиявии Қатар оид ба ҳамкорӣ дар соҳаи мубодилаи иттилооти кашшофии молиявӣ вобаста ба ҷиноятҳои алоқаманд ба қонунигардонии (расмикунонии) маблағҳо ва маблағгузории терроризм;
— Созишнома байни Ҳукумати Ҷумҳурии Тоҷикистон ва Ҳукумати Давлати Қатар оид ба канорагирӣ аз андозбандии дукарата ва пешгирӣ намудани саркашӣ аз супоридани андозҳо аз даромад ва сармоя;
— Ёддошти тафоҳум оид ба ҳамкорӣ дар соҳаи фаъолияти хайриявӣ ва башардӯстона байни Вазорати рушди иқтисод ва савдои Ҷумҳурии Тоҷикистон ва Мақомоти танзимкунандаи фаъолияти хайриявӣ дар Давлати Қатар;
— Ёддошти тафоҳум байни Вазорати рушди иқтисод ва савдои Ҷумҳурии Тоҷикистон ва Мақомоти минтақаҳои озоди Қатар;
