Дар як ҳодисаи тирандозӣ дар мактаби миёнае дар иёлати Бритиш Колумбияи Канада 9 нафар кушта шуда, дасти кам 25 каси дигар захмӣ шудааст.
Бино ба иттилои пулис, ҳодиса рӯзи 11-уми феврал соати тақрибан 13:20 ба вақти маҳаллӣ дар шаҳраки кӯчаки Тамблер-Риҷи иёлати Бритиш Колумбия, ки ҳамагӣ 3 ҳазор ҷамъият дорад, рух додааст. Тибқи гузоришҳои ахир, вазъи саломатии ду нафар аз захмиён вазнин арзёбӣ мешавад.
Мақомоти пулис агарчи ҷузъиёти бештаре аз ин ҳодисаро нашр накардааст, аммо таҳқиқоти аввалия нишон медиҳад, ки ҳамлагар як зани ҷавони 18-сола буда, бо силоҳ муҷаҳҳаз будааст. Гуфта мешавад, муҳоҷим аввал ду нафар аз афроди хонаводаашро, ки яке модараш ва дигарӣ бародари 11-солааш буд, кушта, сипас ба мактаб омада, шаш нафар – як омӯзгор ва панҷ хонанди дигарро мепарронад ва дар охир худашро низ мекушад.
Пулиси иёлати мазкур ба расонаҳо гуфта, ки гумонбаршудаи ҳамла духтари 18-солаи сокини маҳаллӣ бо номи Ҷесси Ван Рутселар будааст. Пулис таъкид карда, ки Ҷесси аз ҷиҳати биологӣ мард ба дунё омада буд, аммо тақрибан шаш сол пеш даст ба тағйири ҷинсият зада, худро дар ҷомеа зан муаррифӣ мекард.
Ҳамзамон таъкид мешавад, ки пулиси маҳаллӣ ба хотири ҳалли мушкилоти хонаводагии ҳамлагар борҳо ба хонаи онҳо даъват шудааст. Ва ҳатто ду сол пеш аз хонаи хоби ӯ чанд адад силоҳи оташфишон пайдо ва мусодира шуда буд.
То ҳол ангезаи ҳамла ва куштани нафарони зиёд аз ҷониби ҷавони 18-сола маълум нест. Ва инчунин гуфта мешавад, ки ҳеч қурбоние ҳадафмандона интихоб нашудааст, ки далели кинаву адовати қаблӣ вуҷуд дошта бошад. Пулис мегӯяд, дар ин бора парванда боз карда, таҳқиқот идома дорад.
Тирпарронӣ дар мактабҳо ва куштани хонандагону омӯзгорон чанд соли ахир дар кишварҳои ғарбӣ бештар шудааст. Ба гуфтаи коршиносон, қонуни иҷозати истифода аз силоҳ дар Амрико ва Канада омори чунин ҷиноятҳоро бештар мекунад. Ҳукумати Канада баъди ҳодисаи мушобеҳи маргбори соли 2020 назорат бар силоҳро сахттар карда буд.
