Мусобиқаи байналмилалии куштигирӣ барои дарёфти Ҷоми Наврӯзӣ бо ҳузури намояндаҳои 30 кишвари дунё баргузор мешавад.
Бино ба иттилои расмӣ, 6-уми марти соли 2024 маросими ифтитоҳи мусобиқаи байналмилалии куштигирӣ бо ҳузури 200 нафар аз паҳлавонони кишварҳои хориҷӣ ба кори худ оғоз кард.
Ин панҷумин мусобиқаи байналмилалии куштӣ барои дарёфти Ҷоми шаҳрдори Душанбе буда, он дар Қасри теннис ва маҷмааи варзиши обии пойтахт бо ҳузури паҳлавонони дохилӣ ва хориҷӣ гузаронида мешавад.
Барои ширкати дар ин мусобиқот Федератсияи Самбокурӯши Афғонистон ҳам эълон карда, ки 12 нафар аз варзишкорони худро ба Тоҷикистон эъзом кардааст.
Аз замони дубора сари қудрат омадани Толибон дар Афғонистон ин бори аввал нест, ки варзишкорони ин кишвар барои анҷоми мусобиқот ба Тоҷикистон сафар мекунанд, балки дар гузашта ҳам борҳо дар мусобиқоти варзишӣ, аз ҷумла футбол, бокс, ҷудо ва ғайра вориди кишварамон шудаанд.
Бо вуҷуди он ки мақомоти Тоҷикистон ва дар раъси онҳо Эмомалӣ Раҳмон борҳо аз минбарҳои дохилӣ ва ҷаҳонӣ эълон кардаанд, ки ҳукумати кунунии Афғонистон бо раҳбарии Иморати исломии Толибонро қабул надоранд, вале амалан тиҷорат ва муносибатҳои пасипардагӣ идома дорад.
Додгоҳи олии Тоҷикистон ин гурӯҳро “террористӣ” хонда, ҳар гуна фаъолияти онро дар қаламрави Тоҷикистон мамнуъ эълон кардааст, аммо ҳукумати Эмомалӣ Раҳмон ва дигар мақомоти зертобеи он дар муносибат бо ин гурӯҳ озоданд.
Барои мисол, дар замоне ки сокинони Тоҷикистон дар сармои замистон бо камбуди шадиди нерӯи барқ мувоҷеҳ ҳастанд, ширкати “Барқи тоҷик” фурӯши нерӯи барқ ба Афғонистонро дар соли ҷорӣ нисбат ба соли 2023 наздик ба 20% зиёдтар кардааст.
Гуфта мешавад, ин мусобиқоти байналмилалӣ барои дарёфти Ҷоми Наврӯзӣ аз 6 то 9-уми марти соли ҷорӣ дар шаҳри Душанбе, пойтахти Тоҷикистон баргузор мешавад. Ҳайати кумитаи тадорукоти ин мусобиқот аз ҳисоби маблағҳои Фонди рушди пойтахт 1 миллону 437 ҳазору 500 сомонӣ барои баргузории он ҷудо кардаанд.
