Дар ҳоле, ки мақомоти Русия фишорҳо болои муҳоҷирони кории тоҷики муқими ин кишварро афзоиш медиҳанд, мақомоти расмӣ дар шаҳри Душанбе баҳси ҳамкориҳои Тоҷикистон ва Чинро дар авлавият қарор додаанд.
Бино ба иттилои расмӣ, дирӯз, 29-уми майи соли 2023 “муовини вазири корҳои хориҷии Ҷумҳурии Тоҷикистон Шараф Шерализода сафири фавқулода ва мухтори Ҷумҳурии Мардумии Чин дар Ҷумҳурии Тоҷикистон Тзи Шуминро ба ҳузур пазируфт.”
Ба қавли манбаъ, дар рафати ин дидор ҷонибҳо натиҷаҳои сафари давлатии Эмомалӣ Раҳмон ба Чинро, ки “аз 16 то 19 майи соли 2023, инчунин татбиқи ҳамкориҳои мутақобилан судманди муштарак дар бахшҳои мухталиф”-ро ба баҳсу баррасӣ қарор доданд.
Гуфта мешавад, хеле аз коршиносони тоҷик бар ин боваранд, ки яке аз сабабҳои зиёд шудани фишорҳо, боздоштҳо ва бозпурсиҳои муҳоҷирони тоҷики муқими Русия ҳамин сафари Президенти Тоҷикистон ба Чин будааст.
Ин коршиносон мегӯянд, яке аз иллатҳои нороҳат шудани русҳо кам шудани боварии онҳо ба давлатмардони Тоҷикистон аст, ки Маскавро пушт карда, ба Пекин рӯ овардаанд. Далелашон ҳам мулоқотҳои Эмомалӣ Рамҳон тайи ҳамин сафараш ба Чин бо як қатор раҳбарон ва тоҷирону сармоягузорони ин кишвар арзёбӣ мешавад.
