Сафорати Тоҷикистон дар Русия эълон кардааст, ки танҳо дар як боздоштгоҳи муваққатии Маскав беш аз 135 муҳоҷири тоҷикистонӣ дар интизори ихроҷ қарор доранд.
Бино ба иттилои расмӣ, 22-юми июли соли 2024 масъулини сафорати Тоҷикистон дар Русия бо муҳоҷирони боздоштшудаи тоҷикистонӣ дар боздоштгоҳи Сахаровои шаҳри Маскав мулоқот кардаанд.
Ба қалви манбаъ, дирӯз, “кормандони Хадамоти консулии Сафорати Ҷумҳурии Тоҷикистон дар Федератсияи Русия аз Маркази нигаҳдории муваққатии шаҳрвандони хориҷии Сарраёсати Вазорати корҳои дохилии Федератсияи Русия воқеъ дар Сахаровои шаҳри Москва боздид ба амал оварданд.”
Сафорати Тоҷикистон хабар додааст, ки дар ҳоли ҳозир “дар маркази номбурда 136 нафар шаҳрвандони Ҷумҳурии Тоҷикистон қарор доранд”, ки дар байни байни он чанде аз муҳоҷирзанҳо ҳам вуҷуд доранд.
Гуфта мешавад, вазъи муҳоҷирони боздоштшуда дар ин ва дигар боздоштгоҳҳои муваққатии Русия барои муҳоҷирон хуб нест. Дар аксари ҳолатҳо гуруснагӣ, камобӣ ва тибқи меъёр тозаву мураттаб набудани боздоштҳои муваққатӣ мушкилоти боздоштшудаҳоро зиёдтар ва афсурдагии онҳоро афзун мекунад.
Инчунин аз ҳад зиёд будани муҳоҷирон дар ин боздоштгоҳи муваққатӣ кормардони сафорартро маҷбур карда, ки аз раҳбарони Маркази нигаҳдории муваққатии шаҳрвандони хориҷӣ дар Маскав талаб кунанд, ки раванди фиристодани онҳо ба Ватанро зудтар анҷом диҳанд.
