Баъзе аз сокинони пойтахт аз он шикоят доранд, ки чун корманди давлатӣ нестанд, фарзандонашонро аз боғчаи кӯдон меронанд.
Як сокини пойтахт бо номи Муҳаммад дар Фейсбук аз таъбиз дар боғчаи кӯдаконаи рақами 68 шаҳри Душанбе ба Вазорати маориф шикоят кардааст. Ӯ менависад, мудири ин боғчаи кӯдакона, Ҷаборовна Дилафруз, ба ин шаҳрванд гуфтааст, ки кӯдаконе, ки модаронашон корманди давлатӣ нестанд, аз боғча ронда мешаванд. Вай хитоб ба масъулини Вазорати маориф навиштааст.
“Вазорат, шумо ин миллатро ба табақа ҷудо мекунед. Мо ҳаққи боғчаро сари вақт медиҳем, оё шумо ҳеҷ раҳму шафқат барои ин миллат надоред? Ва ё душмани ин миллат ҳастед. Ин чӣ қонуни аблаҳона аст, ки фарзандони моро, ки гуноҳашон танҳо дар он аст, ки модарашон корманди давлатӣ нест, аз боғча меронед? Агар дурӯғ бошад, чораи ин мудирро бинед”.
Корбарон дар зери ин хабар изҳори назар карда, амали мудири боғчаро нописанд хонда ва хостори вокуниши Вазорати маориф дар ин бора шудаанд.
Дар ҳамин ҳол, гурӯҳи дигар аз корбарон иддао карданд, ки ин хабар воқеият надорад ва туҳмат ба мудири боғчаи кӯдакони мазкур мебошад. Баъзеҳо низ навиштаанд, ки онҳо корманди давлатӣ нестанд, вале фарзандонашон дар ҳамин боғча тарбият мешаванд.
Бо вуҷуди ин, муаллифи ин хабар исрор дорад, ки гуфтаҳояш дуруст аст ва кормандони ниҳодҳои зидди коррупсия ва Вазорати маориф метавонанд масъаларо мавриди баррасӣ қарор диҳанд.
Ҳамзамон гуфта мешавад, ки мудири муассиса айни ҳол дар рухсати меҳнатӣ буда, дар боғча ҳузур надорад.
То ҳол раҳбарияти боғчаи кӯдакони рақами 68-и пойтахт ва ё масъулини Вазорати маориф ва илми Тоҷикистон дар ин бора вокуниш накардаанд.
