Бонки миллии Тоҷикистон қурби пули миллӣ-сомониро дар баробари рубли русӣ наздик ба 6 дарсад пойин бурд.
Имрӯз, 31-уми майи соли 2022 Бонки миллии Тоҷикистон қурби пули миллӣ-сомониро дар муқобили қурби рубли русӣ ҳудуди 6% пойин бурда, айни замон арзиши 1 рубли русиро баробар ба 0.1770 сомонӣ таъйин кардааст.
Ин ҳам дар ҳолест, ки дирӯз, 30-юми майи соли ҷорӣ дар ин бонк қурби 1 рубли русӣ баробар ба 0,167,5 сомонӣ эълон шуда буд. Акнун бо ҳисоби имрӯз, арзиши 1000 рубли русӣ баробар ба 177 сомонӣ таъйин шудааст.
Аммо бонкҳои тиҷоратии Тоҷикистон ба монанди Коммерсбонки Тоҷикистон хариди 1000 рубли русиро 140 ва фурӯши онро 195 сомонӣ эълон кардааст. Дар Бонки байналмиллалии Тоҷикистон бошад, арзиши 1000 рубли русӣ ҳангоми харид 170 ва дар вақти фурӯш 185 сомонӣ таъйин гардидааст.
Бо ин ҳол дар Халиқ бонк Тоҷикистон бошад, қурби 1000 рубли русӣ барои харид 160 ва барои фурӯш 180 сомонӣ муқаррар гардидааст. Аммо дар Ориёнбонку Амонатбонк ва Бонки Эсхата бошад арзиши 1000 рубли русӣ ҳангоми харид аз 155 сомонӣ то 175 сомонӣ ва дар вақти фурӯш аз 156 то 180 сомонӣ эълон шудааст.
Гуфта мешавад, аз замони оғози ҷанги Русия ва ҳамлаҳои нерӯҳои ин кишвар алайҳи Украина қурби рубли русӣ дар баробари арзҳои хориҷӣ ба таври сунъӣ боло ва пойин бурда шудааст, ва Бонки миллии Тоҷикистон низ дар ин муддат борҳо арзиши пули миллӣ-сомониро болову паст намуда, аммо бонкҳои тиҷоратии кишвар, ки бо мардум доду гирифт доранд, ҳамеша дар ин бора ба фарқ аз Бонки миллӣ қурби муайянкардаи худро доранд.
