Шаби 5-уми марти соли ҷорӣ дар деҳаи Турушбоғи шаҳри Ҳисор боз се узви як хонавода бар асари дуди ангишт заҳролуд шуда, ҷон бохтанд.
Имрӯз, 6-уми март Кумитаи ҳолатҳои фавқулодда ва мудофеаи граждании Тоҷикистон бидуни зикри тафсилоти ҳодиса ва зикри ному сину соли фавтидагон дар ин бора гузориш нашр кардааст.
Кумитаи ҳолатҳои фавқулодда ба хонаводаи фавтидагон изҳори ҳамдардӣ карда, аз сокинон хостааст, ки “тамоми қоидаҳои бехатариро риоя кунанд. Бухорӣ ва дудбароҳоро тафтиш кунанд!”.
Дар давоми камтар аз ду ҳафта ин ҳодисаи чорум аст, ки сокинони Тоҷикистон бар асари дуди ангишт ва сӯхтори хона чанд нафар аз як хонавода вафот мекунанд.
Бо оғози сардии ҳаво дар чанд рӯзи ахир барқ дар тамоми шаҳру ноҳияҳои Тоҷикистон қатъ гардид ва дар пайи ин бебарқӣ ва сардии ҳаво аҳолии кишвар талош карданд, хонаҳои худро бо бухориҳо гарм кунанд ва аз ангишт истифода карданд.
Бори охир рӯзи 2-уми марти соли 2024, 3 кӯдаки ноболиғ дар шаҳри Душанбе бар асари оташ гирифтани хона аз дуди ғализ заҳролуд шуда, ҷон бохтанд.
Пеш аз он Муҳаммад Иқболи Садриддин, раҳбари шабакаи “Ислоҳ.нет” дар саҳифаи фейсбукияш иттилоъ дода буд, ки рӯзи ҷумъаи 1-уми марти соли ҷорӣ “Панҷ сокини Хистеварз аз бе барқӣ ҳалок шуданд”.
Ва пеш аз инҳо шаби 27 ба 28-уми феврали соли ҷорӣ шаш сокини ноҳияи Фирдавсии шаҳри Душанбе, ки ҳамагӣ узви як хонавода буданд, бар асари дуди ангишт ҷон бохтонд. Ба қавли расонаҳо, ин шаш нафар иборат аз падари 38-солаи ин хонавода, модари 37-сола, фарзандони 11, 9, 8 ва 6-сола буданд. Ҳамсояҳо аз марги онҳо нисфирӯзии 28-уми март бо хабар шуданд.
Ин ҳодисаҳо дар рӯзҳои сардии ахир дар Тоҷикистон пайҳам рух медиҳанд, ки ҷомеаи тоҷикро сахт нигарон кардааст.
То ҳол масъулони ҳукумати кишвар намехоҳанд сабаби барқхомушкунии сартосариро шарҳ диҳанд. Танҳо масъулони “Барқи тоҷик” гуфтанд, ки дар Душанбе “лимит” ҷорӣ накардаанд ва қатъи барқ ба камшавии об дар обанборҳо рабт дорад.
