Муҳаммад Бобозода, сардори идораи замини шаҳри Исфара бо иттиҳоми гирифтани пора боздошт шудааст. Дар ин бора Шарифҷон Ҷумъазода, раиси шаҳри Исфара зимни нишасти хабарие иттилоъ дод.
Ба гуфтаи ӯ Муҳаммад Бобозода аз вазифааш 6-уми январи соли ҷорӣ сабукдӯш шудааст ва ҳоло тафтишоти пешакӣ идома дорад.
Дар ҳамин ҳол ба “Asia-Plus” як манбаи дигар низ бе овардани номаш гуфтаааст, ки Бобозода айни ҳол дар боздоштгоҳ аст.
То ҳол мақомот расман дар бораи ҳаҷми пора, аз кӣ гирифтани он ва аз сӯйи кадом ниҳод боздошт шудани сардори пешни идораи замини шаҳри Исфара чизе нагуфтаанд.
Назари худи Муҳаммад Бобозозода ва пайвандону вакили дифоаш дастраси расонаҳо нашудааст.
Бояд гуфт, боздошт ва муҷозоти масъулини идораҳои замин дар шаҳру навоҳии Тоҷикистон аз мушкили доғ боқӣ монда, ҳатто раисҷумҳури худкомаи Тоҷикистон Эмомалӣ Раҳмон зимни суханрониҳияш борҳо дар ин бора гуфта буд.
Ҳар сол даҳҳо мақомдор бо иттиҳоми ғайриқонунии хариду фурӯши замин боздошт мешавад, вале боз ҳам ин раванд идома дорад. Ба гуфтаи коршинсон, заминфурӯшону аснод тартиб медодагиҳо худи мақомот ҳастанд, ки бо гирифтани пора ва ё хешутаборбозӣ заминҳои зиёдеро дар ихтиёри дигарон мегузоранд, вале сокинони ниёзманд дарбадари мақомот барои як тикаи замин мегарданду солҳо навбат мепоянд боз ҳам чизе ҳосилашон намешавад.
Коршиносон мегӯянд, фасод ва ришвар дар тамоми соҳаҳои кишвар чунон афзоиш ёфтааст, ки пеши ин ҷиноятҳоро гирифтан маҳол аст. Зеро, ба гуфтаи онҳо, ин тарзи муомиларо худи ҳамон мансабдор вақти гирифтани мансабаш дидааст, яъне мансабро бо додани пул харидааст ва ӯ низ ин корро идома хоҳад дод. Пас ба ҳамин тариқ решаи ин кор рафта ба нафарони асосии кишвар мерасад, ки маҳви он аз имкон дур аст.
