Имрӯз, 6-уми июл Додситонии Федералии Олмон аз боздошти ҳафт зодаи кишварҳои Осиёи Марказӣ бо иттиҳоми терроризм хабар дод.
Гуфта мешавад, дар миёни боздоштшудаҳо 5 нафарашон шаҳрвнадони Тоҷикистон, як нафар аз Қирғизистон ва як тани дигар аз Туркманистон мебошанд.
Боздошти Ато А., шаҳрванди Туркманистон, Аброрҷон К., шаҳрванди Қирғизистон, Муҳаммадшуҷо А., Нуриддин Қ., Шамшуд Н. ва Рабони З., шаҳрвандони Тоҷикистон аз ҷониби пулис дар заминҳои Рейн-Вестфалияи Шимолии Олмон сурат гирифтааст.
Боздоштшудаҳо ба таъсис додани гурӯҳи террористӣ дар Олмон ва ҳимоят аз созмони террористии “Давлати исломӣ” (ДИИШ) гумонбар мебошанд.
Бино ба иттилои Додситонии Олмон, боздоштшудаҳо якдигарро мешинохтаанд ва пас аз оғози ҳамлаи Русия ба Украина дар соли 2022 вориди хоки Олмон шудаанд.
Дар охири моҳи июни соли 2022 онҳо барои ташкили як созмони террористӣ бо ҳадафи анҷоми ҳамлаҳои пурсарусадои террористӣ дар Олмон муттаҳид шуданд.
Ба гуфтаи додситонӣ, онҳо аллакай ҳадафҳоро кашф карда ва талош доштаанд, ки силоҳ ба даст оранд.
Ба ҷуз Аброрҷони К., боздоштшудаҳо дар Олмон низ аз моҳи апрели соли 2022 барои ДОИШ пул ҷамъоварӣ мекарданд ва борҳо барои ин созмон ба хориҷ маблағ интиқол додаанд.
Мақомоти Олмон мегӯяд, ин гурӯҳ бо аъзои бахши минтақавии “Вилояти Хуросони Давлати Исломӣ” дар хориҷ иртибот доштаанд.
Назари боздоштшудаҳо то ҳол дастраси расонаҳо нашудааст.
Имрӯз ва фардо мурофиаи боздоштшудаҳо баргузор мегардад ва Додгоҳи Федералӣ дар бораи иҷрои ҳабси пешакӣ тасмим мегирад.