Собиқи раиси шаҳри Конибодом Абдусалом Тухтасунзода охири моҳи феврал дар Узбекистон дастгир ва ба Тоҷикистон оварда шудааст.
Радиои Озодӣ дар истинод ба манобеаш менависад, ки Тухтасунзода ба ришвагирӣ ва қаллобӣ гумонзад буда, дар Боздоштгоҳи муваққатӣ дар шаҳри Хуҷанд нигоҳ дошта мешавад.
Дар баробари Абдусалом Тухтасунзода чанд мақомдори дигар, ки то ҳол номи ду нафари онҳо расонаӣ шудааст, аз ҷумла Суҳроб Умарзода, муовини пешини сардори Шуъбаи корҳои дохилӣ ва Усмон Ҳайдар, мудири собиқи амволи ҳукумати Конибодом низ дастгир шудаанд.
Бино ба иттилои манбаъ, боздошти ин афрод баъди ба Конибодом расидани як комиссияи вежа барои таҳқиқи кушторҳои пайиҳам дар охири соли гузашта матраҳ шудааст. Гуфта мешавад, аъзои ин комиссия сохтмони чанд хонаро дар заминҳои обӣ пайдо карда, ба Душанбе гузориш додаанд ва аз онҷо дастур шудааст, ки кори мақомоти Конибодом пурра санҷида шавад, чун онҳо ҳодисаҳои кушторро ҷиддӣ таҳқиқ накардаанд.
Мақомоти расмӣ то ҳол аз боздошти чанд масъул дар Конибодом чизе нагуфтаанд ва назари худи гумонбарон ва пайвандону вакилони дифоашон дар ин бора дастрас нест.
Ёдовар мешавем, ки Абдусалом Тухтасунзода пас аз се соли раисӣ дар моҳи январи соли ҷорӣ бо далели ба кори дигар гузаштан аз мансаби раиси шаҳри Конибодом барканор шуда буд.
