Мақомоти Толибони Афғонистон аз боздошти 3 узви ДИИШ хабар доданд, ки яке аз онҳо шаҳрвнади Тоҷикистон гуфта мешавад.
Толибон бо нашри наворе аз ин 3 узви гурӯҳи ДИИШ-и Хуросон эътироф мегирад. Ин се нафар дар чанд амали террористӣ гумонбар мешаванд. Ҳарсе ҳам мегӯянд, таълимоти низомиро барои интиҳорӣ ва амалҳои террористӣ дар кӯҳҳои Балучистони Покистон гирифтаанд.
Яке аз ин боздоштшудаҳо худро Расул писари Диловар, зодаи ноҳияи Қумсангир (ҳоло Ҷайҳун)-и вилояти Хатлон муаррифӣ мекунад. Ӯ мегӯяд, дар ДИИШ ба номи Усмон машҳур аст.
Ба иқрори худи Расул, ӯ якуним сол пеш ба гурӯҳи ДИИШ даъват шуда ва баъдан тариқи паёмрасони Телеграм роҳнамоӣ шуда, худро ба ҷойҳои лозимӣ расондааст. Пас аз пайвастан ба ин гурӯҳ ӯро барои омӯзиш ба вилояти Балучистони Покистон бурдаанд.
“Дар кӯҳҳои Балучистон муаскарот (пойгоҳҳои низомӣ)-и гурӯҳи ДОИШ буд, тӯли якуним моҳ онҷо дарсҳои ақидавӣ мехондем, баъд аз якуним моҳ моро ба Афғонистон равон карданд. Дар Кобул дар хонаи як ДОИШ-ӣ ба номи Ҳорун мунтазири амали интиҳорӣ будам.“, мегӯяд Расул.
Маълум нест боздошти ин шаҳрвнади Тоҷикистон кай сурат гирифтааст, аммо хабари боздошти онҳоро Ожонси хабарии Бохтар имрӯз, 3-юми октябр нашр кард. То ҳол мақомоти тоҷик дар бораи ин шаҳрванди Тоҷикистон вокунише накардаанд.
Ин бори аввал нест, ки Толибон аз боздошти шаҳрвандони Тоҷикистон бо иттиҳоми пайвастан ба ДИИШ хабар медиҳад. Моҳи августи соли гузашта чунин наворе низ нашр шуда буд, ки як гурӯҳ аз шаҳрвнадони Тоҷикистон худро узви ДИИШ муаррифӣ мекарданд.
Дар он навор ҷавонони тоҷики боздоштшуда ба узви ДИИШ будани худ иқрор карда, аз кардаашон изҳори пушаймонӣ мекунанд. Ному насаб ва макони зисти онҳо низ ба таври комил нашр шуда буд.
Толибон, ки ҳоло дар Афғонистон қудратро ба даст гирифтааст, иддао дорад, бахши умдаи гурӯҳи ДИИШ-и Хуронсонро ҷавонони тоҷикистонӣ ташкил медиҳанд. Ва аксари амалиёти интиҳорӣ ва таркишҳое, ки ҳоло дар Афғонистон анҷом мешаванд, онҳоро ин гурӯҳ анҷом медиҳанд.
