Дар ҳошияи нишасти солонаи ҳуқуқи башари Созмони Амният ва Ҳамкории Аврупо (САҲА) дар Варшава қазияи рӯзноманигорони зиндонии тоҷик баҳсу баррасӣ шуд.
Дар ин нишаст, намонядагони кишварҳои узви САҲА, созмонҳои ҳомии ҳуқуқи рӯзноманигорон ва мухолифини табъидии Тоҷикистон ширкат карданд.
Гулноза Саид, намояндаи Кумитаи ҳимоят аз ҳуқуқи рӯзноманигорон (CPJ), Муҳаммадҷон Кабиров, сардабири Azda TV, Фарҳод Одинаев ҳомии ҳуқуқи башар ва фаъоли маданӣ, Шавкати Муҳаммад сардабири Payom TV, ва Фирӯзи Ҳаит, рӯзноманигори Azda TV дар ин нишаст суҳбат карданд.
Гулноза Саид дар суҳбаташ гуфт, ки вазъи озодии баён дар давоми 3-4 соли охир дар Тоҷикистон нисбати ба дигар кишварҳои Осиёи Марказӣ аз ҳама бадтар шудааст. Ба гуфтаи ӯ, Тоҷикистон дар зиндонӣ кардани рӯзноманигорон дар байни ин кишварҳо дар ҷои якум меистад.
Хонум Гулноза афзуд, ки ҳоло 8 рӯзноманигори тоҷик аз 8 то 20 солӣ маҳкум ба зиндон шудаанд. Ва дар раванди боздошти онҳо қонунҳо поймол гашта, мурофиаи додгоҳии онҳо пушти дарҳои баста баргузор гашт ва ҳеҷ маълумоте аз ҳукми ниҳоии онҳо нашр нашудааст.
“Мо қазияи Улфатхоним Маҳмадшоеваро баррасӣ кардем, ӯ 60-сола аст, вазъи саломатияш бад аст ва ҳеҷ маълумоте аз ҳукми додгоҳ ва иттиҳомоти алайҳи ӯ ва шароиташ дар дохилии зиндон пайдо накардем.”, мегӯяд Гулноза Саид.
Ин намояндаи CPJ дар канори Улфатхоним Мамадшоева аз чанд рӯзноманигори зиндонии дигар, аз ҷумла Хушрӯз Ҷумаев, Абдулло Ғурбатӣ, Далер Эмоалӣ, Завқибек Саидаминӣ, Абдусаттор Пирмуҳаммадзода, Хуршед Фозилов ва Аҳмад Иброҳим ном бурд, ки ба гуфтаи ӯ, тибқи маълумоти дарёфтӣ, онҳо дар зиндон шиканҷа шудаанд ва дар ниҳоят гирифтори бемориҳо шуш, Ковид19 ва фишори хун шудаанд.
Ӯ таъкид кард, ки ҳоло Улфатхоним аз бемории фишори хун ранҷ мебарад ва “бо фарорасии фасли зимистон ва шароити бади зиндонҳои Тоҷикистон мо нигарони саломатии ӯ ва дигар ҳамкасбони зиндонии ӯ ҳастем.”
Ҳамчунин дар ин нишаст, Муҳамадҷон Кабиров, сардабири Azda TV дар бораи вазъи расонаҳо ва рӯзноманигорони табъидӣ суҳбат кард. Ӯ гуфт, ки мақмомоти Тоҷикистон барои фишор болои рӯзноманигорони табъидӣ пайвандони онҳоро дар Тоҷикистон пайваста мавриди озору шиканҷа қарор медиҳанд.
“Мақомоти Тоҷикистон ҳатто пайвандони рӯзноманигорони табъидиро зиндонӣ мекунанд, моликият ва дорои онҳоро мусодира ва аз тариқи Интерпол ва Созмони Паймони Амнияти Дастаҷамъӣ (СПАД) дар пайгард қарор медиҳанд.”, мегӯяд сардабири Azda Tv.
Кабиров дар поёни суханронияш аз кишварҳои Ғарбӣ даъват кард, ки алайҳи мақомоти кишварҳое, ки дар саркӯби рӯзноманигорон даст доранд, таҳрим ҷорӣ кунанд.
