Рӯзи 8-уми сентябри соли ҷорӣ дар майдони “Истиқлол”-и шаҳри Душанбе бахшида ба ҷашни 32-солагии истиқлоли давлатии Тоҷикистон ва 30-юмин солгарди таъсисёбии Қувваҳои Мусаллаҳи кишвар паради ҳарбӣ баргузор гардид.
Дар гузашти наздики 20 ҳазор сарбози Қувваҳои Мусаллаҳ, раисҷумҳур Эмомалӣ Раҳмон ва писараш Рустами Эмомалӣ, шаҳрдори Душанбе ва раиси Маҷлиси миллии Маҷлисӣ Олӣ, сарвазир Қоҳир Расулзода ва дигар мақомдорон иштирок доштанд.
Эмомалӣ Раҳмон зимни суханронияш дар ин паради низоми Истиқлоли давлатиро “азизтарин неъмат ва бузургтарин дастоварде” номид, ки тоҷикон “баъди ҳазор соли бедавлатӣ” ба он муяссар гардидаанд.
Дар идома мисли ҳамеша Раҳмон аз ҷанги солҳои 1992 ёд оварда, онро “таҳмилӣ” ва кори дасти “хоинону бадхоҳони дохиливу хориҷӣ” номид.
Инчунин Эмомалӣ Раҳмон дар ин суханрониаш бе овардани номи созмоне аз “вусъат пайдо кардани фаъолияти ҳаракату созмонҳои террористиву экстремистӣ ва радикалӣ, қочоқи маводи мухаддир, ҷиноятҳои киберӣ ва дигар ҷинояткориҳои муташаккили фаромиллӣ ва илова бар ин, мусаллаҳшавии бошитоб ва шиддат гирифтани «ҷанги сард»” ва аз нигаронии сокинон гуфту мардумро тарс дода, таъкид кард, ки “эҳтимоли шиддати бештар пайдо кардани чунин вазъият” вуҷуд дорад.
Дар идомаи ин гуфтаҳояш Раҳмон аз роҳбарони артиш ва мақомоти ҳифзи ҳуқуқи кишвар хост, ки дар ин шароит дар ҳолати омодабош бошанд.
Раҳмон инчунин аз номи мардуму ҳукумат аз низомиёни кишвар сипосгузорӣ карда, аз онҳо даъват кард, ки Ватанро баробари ҷони худ, мисли модар ва фарзандони худ дӯст доранд ва онро ҷавонмардона ҳимоят кунанд.
Сипосгузории Раҳмон аз сарбозону даъваташ барои ҳимояи Ватан аз онҳо дар ҳоле аст, ки ҷавонон ҳангоми хидмат дар сафи Қувваҳои мусаллаҳи кишвар бо бадрафторӣ ва шароити бад рӯ ба рӯ ҳастанд.
Худи мақомот дар гузорише ба СММ гуфта буд, ки аз соли 2019 то 2021 ва ба сабаби “риоят нашудани оинномаи низомӣ” бештар аз 100 сарбоз ба ҳалокат расидаанд. Аммо огаҳони умур омори расмии мақомотро зери суол бурда, шумораи сарбозони фавтидаро бештар медонанд.
Вуҷуд доштани бадрафторӣ ва марги сарбозон дар сафи Қувваҳои мусаллаҳ боис гаштааст, ки ҷавонон аз рафтан ба хидмати ҳарбӣ худдорӣ кунанд ва мақомот ин мушкилотро бартараф накарда, даст ба “Облава”-и онҳо мезананд.
