Дар ҳоле, ки артиши Исроил ин шабу рӯзҳо Ғаззаро бомборон дорад ва ҷанг шиддат гирифтааст, додгоҳе дар Исроил парвандаи фасоди молии Бинёмин Натанёҳу, нахусвазири ин кишварро аз сар гиирфтааст.
Бино ба иттилои расонаҳо, парвандаи фасоди молии Натанёҳу аз рӯзи душанбе дигарбора оғоз шудааст. Гуфта мешавад, ин парванда ба далели ҳамлаи ҲАМОС рӯзи 7-уми октябр ба минтақаи шаҳракнишинони Исроил ба таъхир гузошта шуда буд.
Бинёмин Натанёҳу, раҳбари ҳизби растгарои Ликуди Исроил ва нахуствазири ин кишвар ба ришвагирӣ ва хиёнат дар амонат муттаҳам аст, аммо худи ӯ ин иттиҳомотро рад мекунад. Гуфта мешавад, Натанёҳу байни солҳои 2007 – 2016 пружаеро барои бархе сармоядорон дар ивази гирифтани пора пеш бурда, ки тавассути он сармоядорони исроилӣ ва шахсони наздик ба худаш соҳиби маблағҳои ҳангуфт шудаанд.
Аммо бархе аъзои ҳизбаш ин қарори додгоҳро интиқод намуда, гуфтаанд, ки ҳоло замони баррасии ин парванда нест ва Натанёҳу бояд машғули ҳаллу фасли ҷанг бо ҲАМОС бошад.
Ба гуфтаи коршиносон, зоҳиран байни шахси Натанёҳу ва аъзои ҳукуматаш танишҳои пасипардаии зиёде вуҷуд дорад, ки дар чанд рӯзи ахир кам кам ин даргириҳо аз худ дарак медиҳанд. Аз ҷумла, байни аъзои Ситоди ҷанги Исроил, ки худи Натанёҳу онро идора мекунад, ба гуфтаи расонаҳо, нофаҳмиҳои зиёде ба миён омадааст.
Гуфта мешавад, пас аз оне, ки додгоҳи Исроил алайҳи Натанёҳу парвандаи фасоди молӣ боз кард, ӯ мехост бо қабули қонуне салоҳияти додгоҳҳоро кам кунад ва идомаи тафтиши парвандаашро бигирад. Аммо дар натиҷа мардуми зиёде даст ба тазоҳуроти густарда заданд, ки моҳҳо тӯл кашид ва алайҳи ин қарори ҳукумати Натанёҳу эътироз карданд. Дар ниҳоят Натанёҳу маҷбур шуд аз ин қабули ин қарор даст бикашад.
Ёдовар мешавем, ки мақомоти Исроил аз 7-уми октябри соли ҷорӣ, пас аз ҳамлаи ҲАМОС ба шаҳракнишинони Исроил ҳуҷуми ҳавоӣ, дарёӣ ва заминиро ба Ғазза оғоз кард. Бомборонҳои шадиди артиши ин кишвар болои Ғазза то имрӯз ҳудуди 16 ҳазор кушта ва беш аз 40 ҳазор захмӣ баҷо гузошт.
