Дар шаҳри Екатеринбурги Русия мақомот аз охири моҳи ноябри соли 2023 то аввали соли ҷорӣ, ҳудуди 450 муҳоҷиреро, ки гуфта мешавад, аз хидмати ҳарбӣ саркашӣ кардаанд, сабти ном кардаанд.
Кумитаи тафтишотии Русия ба расонаҳо гуфтаанд, ки ин рақам рӯз ба рӯз афзоиш ёфта, аз ин шумора зиёда аз 150 нафарашон, ки шаҳрвандони хориҷӣ будаанд, бо Вазорати дифои Русия созишномаи ҳарбӣ бастаанд.
То ҳол маълум нест, ки ин нафарон шаҳрвандии Русияро доранд ё не ва чанд нафарашон зодагони Тоҷикистонанд. Аммо расонаҳои русӣ менависанд, ки мақомоти ин кишвар дар рӯзҳои таҷлили соли нав ба марказҳои савдо, хобгоҳҳо ва бозорҳои шаҳри Екатеринбург рафта, санҷиш ё “рейд” гузарондаанд.
Дар рафти ин санҷишҳо муҳоҷиронеро, ки шаҳрвандии Русияро доранд дар рӯйхати ҳарбӣ сабти ном намуда, 15 муҳоҷиреро, ки аз хидмати ҳарбӣ дар ин кишвар саркашӣ карда буданд, боздошт шудаанд.
Пештар аз ин шаби якуми январи соли ҷорӣ, мақомоти ин кишвар беш аз 3 ҳазор муҳоҷирро дар шаҳри Санкт-Петербурги Русия боздошт карда буданд, ки аз ин шумора дар асноди 600 муҳоҷир камбудӣ ёфтанд ва эҳтимол меравад зиёда аз 100 нафари онҳоро аз Русия ихроҷ кунанд.
Аммо ба гуфтаи шоҳидон, мақомот дар байни муҳоҷирон бештар онҳоеро меҷустанд, ки нав шаҳрвандии Русияро дарёт кардаанд.
Гуфта мешавад, мақомоти интизомӣ ва амниятии Русия моҳҳои охир даст ба боздошти муҳоҷироне зада истодаанд, ки тоза шаҳрвандии Русияро гирифтаанд ва чанде аз мақомдорони ин кишвар низ барои фиристодани муҳоҷирон ба ҷанг дар Украина ҳарф мезананд.
Чанде пеш Владимир Путин, раисҷумҳури Русия гирифтани шаҳрвандии ин кишварро барои хориҷиён осон карда буд, ки ба гуфтаи коршиносон, ин тасмим барои сарбозгирии бештар аз байни муҳоҷирони Осиёи Марказӣ равона шудааст.
