Дар эътирозоти ахири Ҷумҳурии исломии Эрон, ки бештар аз як моҳ мешавад идома дорад, беш аз 250 нафар кушта шудааст.
Ба гузориши пойгоҳи хабаргузории “Hra-news“, аз оғози эътирозоти мардумӣ дар Эрон 252 нафар кушта шудааст. Дар ин омор аз кушта шудани 35 кӯдак низ гузориш мешавад.
Аммо Созмони афви байналмилал ва дигар созмонҳои ҳуқуқи башарӣ кушта шудани то 27 кӯдакро таъйид кардаанд.
Ҳамзамон ин хабаргузорӣ аз боздошти беш аз 13 ҳазор нафар хабар додааст. Инчунин гуфта мешавад, 28 нерӯи амниятии Эрон низ дар ин даргириҳо бо муътаризон кушта шудаанд.
Ёдовар мешавем, ки эътирозҳои мардумӣ пас аз марги Маҳсо Аминӣ зани 22-солаи курди эронӣ дар торихи 17-уми сентябри соли ҷорӣ сар заданд. Гуфта мешавад, полиси ахлоқ ё “маъмурони Гашти иршод” бону Маҳсо Аминиро барои тарзи либоспӯшиаш 13-уми сентябр боздошт карда, чор рӯз пас аз он ҷасади беҷони ӯро ба хонаводааш таҳвил доданд.
Хонаводаи Маҳсо Аминӣ ва эътирозгарон мегӯянд, ки вай дар асари шиканҷа ҷон бохтааст, вале мақомоти эронӣ ин ривоятро рад карда мегӯянд, ки марги ин хонум ба далели сактаи қалбӣ будааст.
Бештар аз як моҳ мешавад, ки эътирозҳо дар саросари Эрон густариш ёфта, айни замон донишҷӯёни донишгоҳҳо ба таври густарда даст ба эътироз задаанд. Гуфта мешавад, то кунун ҳазорҳо нафар бо шумули донишҷӯён ва рӯзноманигорон боздошт шудаанд.