Кумитаи давлатии амнияти миллии Тоҷикистон аз куштани ду қочоқбари афғон хабар дод.
Бино ба иттилои телевизиони давлатии Тоҷикистон, шаби 20-уми ноябри соли ҷорӣ, нерӯҳои КДАМ бо истифода аз “бесарнишинҳои сохти ватанӣ” ҳафт кочоқбарро пас аз убури марзи Афғонистон бо Тоҷикистон дар марзи ноҳияи Ҳамадонӣ мавриди ҳамла қарор додаанд.
Дар натиҷаи ин ҳамла ду қочоқбар, Шероғо валади Аввалмир ва Ҷумъагул валади Ҳаким, зодагони вулусволии Дарқади вилояти Тахори Афғонистон кушта шудаанд.
КДАМ дар бораи панҷ нафари дигар чизе нагуфтааст, аммо нерӯҳояш дар ҷойи ҳодиса “116 бастаи маводи мухаддирро дар панҷ халта” дарёфт ва мусодира кардаанд.
Дар ҳоле КДАМ бори аввал аз истифодаи “бесарнишинҳои сохти ватанӣ” хабар медиҳад, ки маълум нест ин дронҳо кай ва аз ҷониби кадом ширкат дар Тоҷикистон сохта шудаанд ва мақомоти кишвар ҳам то ҳол дар ин бора чизе нагуфтаанд.
Гуфта мешавад, воридшавии маводи мухаддир ва задухӯрди мусаллаҳона дар марзи Тоҷикистон бо Афғонистон дар як соли охир афзудааст.
Танҳо дар давоми шаш моҳи аввали соли 2025 дар марзи Тоҷикистон бо Афғонистон 10 даргирии мусаллаҳона байни нерӯҳои амниятии Тоҷикистон ва қочоқбарони афғон ба қайд гирифта шуда, чор қочоқбар кушта шудааст. Ва танҳо дар минтақаҳои наздисарҳадӣ бо Афғонистон 1 тоннаву 692 килограмм маводи мухаддир мусодира шудааст, ки 54,4 дарсади ҳаҷми умумии мусодирашуда дар кишварро ташкил медиҳад.
Кушта шудани қочоқбарони навбатӣ дар ҳоле сурат мегирад, ки чанде пеш мақомдорони Толибон ба намояндагони Тоҷикистон дар Кобул масъалаи мубориза бар зидди қочоқи маводи мухаддирро баррасӣ карда буданд. Нуруллоҳ Нурӣ, вазири умури сарҳадот, ақвом ва қабоили ҳукумати Толибон иддао карда буд, ки онҳо бо қочоқи маводи мухаддир ва қочоқи инсон мубориза бурда истодаанд ва субот дар марзи муштарак нақши муҳиме дар амнияти ду кишвар дорад.
