Қочоқбарони афғон боз марзи Афғонистону Тоҷикистонро убур карда, бо нерӯҳои марзбонии Тоҷикистон даргир шудаанд.
Бино ба иттилои Нерӯҳои марзбонии Кумитаи давлатии амнияти миллии кишвар, шаби 10-уми феврали соли ҷорӣ дар ҳудуди дидбонгоҳи сарҳадии “Дарқад” дар ноҳияи Ҳамадонии вилояти Хатлон 4 қочоқбари афғон сарҳади давлатиро ғайриқонунӣ убур намуда, аз ҳудуди Афғонистон ба хоки Тоҷикистон гузаштанд.
Дар натиҷаи гузаронидани амалиёти ҷангии сарҳадбонон як қочоқбар бо номи Авалмир валади Абдулҳаким, тахминан 45-сола, сокини деҳаи Майдапатаи вулусволии Дарқади вилояти Тахори Афғонистон боздошт ва аз ӯ 46 баста маводи мухаддири навъи “ҳашиш” мусодира гардид. Аммо ба 3 қочоқбари дигар муяссар шуд, ба самти Афғонистон фирор кунанд.
Ҳамчунин аз ҷойи ҳодиса 2 камераи резинӣ дарёфт карда шуд, ки қочоқбарон ҳангоми убури ғайриқонунии сарҳад аз он истифода бурдаанд.
Мақомоти Тоҷикистон вобаста ба ин ҳодиса бар асоси се банди қонуни ҷиноӣ, аз ҷумла қочоқ ва ғайриқонунӣ гузаштан аз сарҳад парванда боз карда, тафтишот оғоз шудааст.
То ҳол назари Толибон, ки ҳукуматро дар Афғонистон дар даст доранд, дастраси расонаҳо нашудааст.
Ин ҳодиса дар ҳоле рух медиҳад, ки дар чанд моҳи охир даргириҳои мусаллаҳона дар марзи Тоҷикистону Афғонистон афзоиш ёфтаанд. Аз ҷумла, рӯзи 18-уми январи соли ҷорӣ Кумитаи марзбонии Тоҷикистон хабар дод, ки дар минтақаи марзии ноҳияи Шамсиддин Шоҳин чаҳор нафар, ки онҳоро «аъзои гурӯҳи террористӣ» номид, кушта шудаанд. Аммо мақомоти Толибон дар Афғонистон иддао карданд, ки ин афрод қочоқбар буданд.
Ҳамчунин рӯзи 24-уми декабри соли гузашта дар ҷараёни як задухӯрди мусаллаҳона дар ҳамин ноҳияи марзӣ ду афсари Қӯшунҳои сарҳадӣ Исматулло Қурбонов ва Зиреҳбон Наврӯзбеков кушта шуданд. Мақомоти Тоҷикистон он замон хабар доданд, ки се ҳамлагар, аз «аъзои ташкилоти террористӣ» нобуд карда шуданд.
Илова бар ин, дар аввали моҳи декабри соли гузашта дар ду ҳамлаи дигар аз қаламрави Афғонистон дар ноҳияҳои Шамсиддин Шоҳин ва Дарвози Тоҷикистон беш аз 10 шаҳрванди Чин куштаву захмӣ шуданд.
