Дар Русия дастрасӣ ба хидматрасонии зангҳои овозӣ ва видеоӣ тавассути паёмрасонҳои Telegram ва WhatsApp қисман маҳдуд шудааст.
Тавре Роскомнадзор расман иттилоъ дод, дар қаламрави Федератсияи Русия маҳдудиятҳо аз рӯзҳои 11-13 августи соли ҷорӣ оғоз гардида, ҳадафи он коҳиш додани сатҳи қаллобӣ, пешгирии даъват ба фаъолияти экстремистӣ ва таъмини амнияти шаҳрвандон мебошад. Ба иттилои манбаъ, қаблан борҳо аз роҳбарияти ин мессенҷерҳо талаб карда шуда буд, ки чораҳои зарурӣ дар мавриди амнияти иттилоотиро роҳандозӣ намоянд, аммо ин масъала ҳанӯз ҳал нагардидааст.
Вазорати рушди рақамии Русия аз иқдоми мазкур ҷонибдорӣ намуда, зикр кардааст, ки маҳдуд кардани зангҳо метавонад ба коҳиши миқдори муроҷиатҳои қаллобона мусоидат намояд.
Дар ҳамин ҳол, роҳбарияти WhatsApp маҳдудиятро нақзи ҳуқуқи беш аз 100 миллион истифодабарандаи худ дар Русия арзёбӣ намуда, таъкид кардааст, ки рамзгузории пурраи мукотиба бояд ҳифз гардад. Намояндагони Telegram иттилоъ доданд, ки мубориза бо мундариҷаи зараровар тавассути ҳуши маснуӣ идома дорад ва омодагии худро барои ҳамкорӣ бо мақомоти дахлдор изҳор намуданд.
Маҳдудсозии хидматрасониҳои мазкур дар доираи сиёсати рушди иқтидори рақамии миллӣ амалӣ шуда, ҳадаф аз он коҳиши вобастагӣ аз технологияҳои хориҷӣ ва рушди платформаҳои дохилӣ, аз ҷумла паёмрасони давлатии MAX гуфта мешавад.
Ёдовар мешавем, ки паёмнависӣ ва дигар хидматрасониҳои ин ду мессенҷер бетағйир боқӣ мондаанд.
Бояд гуфт, ки Telegram ва WhatsApp аз маъруфтарин паёмрасонҳо миёни муҳоҷирон ба ҳисоб мераванд, зеро онҳо асосан барои тамос бо хонавода ва наздикони худ аз ин ду барнома истифода мекунанд.
