Аз 31-уми октябр то 3-юми ноябри соли ҷорӣ дар чанд шаҳру ноҳияҳои Тоҷикистон, аз ҷумла вилояти Хатлон, ноҳияҳои тобеи ҷумҳурӣ ва шаҳри Душанбе эҳтимоли баланд шудани сатҳи ифлосшавии ҳаво пешбинӣ мешавад.
Ба иттилои Агенти обуҳавошиноси кишвар, ин ҳолат дар натиҷаи омилҳои метеорологӣ (хокборише, ки аз самти минтақаҳои ҷанубу ғарбӣ, ҷанубӣ ва ғарбӣ ба кишвар ворид мегардад,) ба вуҷуд меояд. Дар натиҷа, моддаҳои муаллақ, аз ҷумла заррачаҳои чанг бо андозаи PM10 ва PM2.5, ки барои саломатии инсон хатарноканд, дар ҳаво зиёд мешаванд.
Масъулин ба шаҳрвандон тавсия медиҳанд, ки дар ин рӯзҳо аз гаштугузори зиёд дар кӯчаҳо ва хиёбонҳо, махсусан дар наздикии роҳҳои сермошин худдорӣ кунанд. Ҳамчунин тавсия дода мешавад, ки кӯдакон, пиронсолон ва афроди гирифтори бемориҳои нафаскашӣ ё дилу рагҳо эҳтиёткор бошанд ва вақти зиёдро дар дохили биноҳо гузаронанд.
Ба гуфтаи ҳавонишосон, чунин ҳолатҳои ифлосшавии ҳаво (хокбориш) муваққатӣ буда, дар фасли тирамоҳ ва зимистон дар минтақаҳои ҷанубии кишвар зиёд ба назар мерасанд.
