5-уми октябр, мақомоти Тоҷикистону Қазоқистон дар шаҳри Нур-Султон дидор ва масъалаи таҳвил додани маҳсулоти нафтӣ ва гази моеъ ба Тоҷикистонро баррасӣ карданд.
Вазорати корҳои хориҷаи Тоҷикистон хабар дод, ки рӯзи сешанбе Сафири Ҷумҳурии Тоҷикистон дар Ҷумҳурии Қазоқистон Хайрулло Ибодзода ва муовини вазири энергетика ва захираҳои оби Ҷумҳурии Тоҷикистон Шарифа Худобахш бо муовини вазири энергетикаи Ҷумҳурии Қазоқистон Асет Магаумов мулоқот карданд.
Гуфта мешавад, дар мулоқот инчунин намояндагони Хадамоти зиддиинҳисории назди Ҳукумати Ҷумҳурии Тоҷикистон, роҳбарони ширкатҳои қазоқистонии “КазМунайГаз” ва «Тенгизшевройл» иштирок доштанд.
“Ҷонибҳо масъалаҳои рушду тавсеаи ҳамкориҳои дуҷониба, таҳвил додани маҳсулоти нафтӣ ва гази моеъ ба Тоҷикистон, имзои шартномаҳо миёни воридоткунандагони тоҷикистонӣ ва корхонаҳои истеҳсолии қазоқистонӣ дар самтҳои мазкур, инчунин имконияти татбиқи меъёри сифрии хироҷҳои гумрукиро зимни анҷоми амалиёти дахлдори тиҷоратӣ баррасӣ намуданд”, – омадааст дар хабари вазорат.
Аммо маълум нест, ки тибқи созишномаи ду тарафа кай ва чӣ миқдор маҳсулоти нафтӣ аз кишвари Қазоқистон ба Тоҷикистон ворид мешавад.
Ёдовар мешавем, ки шуруъ аз аввали соли ҷорӣ гароншавии маводи сӯхт дар Тоҷикистон ба назар мерасид. Аммо баъд аз даргириҳои хунуни моҳи апрел дар марзи Тоҷикистону Қирғизистон нархи он якбора гарон шуд, ки дар натиҷа роҳкиро ва нарху наворо низ дар бозорҳои кишвар боло бурд. Тоҷикрон гароншавии маводи хӯрокаро низ ба гароншавии маводи сӯхт рабт медиҳанд.
