Пас аз ҳамлаҳои ахири Исроил ба Навори Ғазза садҳо зану кӯдак, аз ҷумла 8 тан аз раҳбарони калидии ҲАМОС кушта шуданд.
Бино ба иттилои Вазорати беҳдошти Ғазза, аз рӯзи 18-уми марти соли ҷорӣ то имрӯз дар пайи ҳамлаҳои ҷадиди Исроил ба Навори Ғазза 730 нафар кушта ва 1367 нафари дигар захмӣ шудаанд, ки аксари онҳоро занону кӯдакони бегуноҳ ташкил медиҳанд.
Ин ниҳод дар Навори Ғазза Эълон кард, аз оғози ҳамлаҳои Исроил, 7-уми октябри соли 2023 то имрӯз беш аз 163 ҳазор фаластинӣ, ки аксари онҳо кӯдакон ва занон мебошанд, кушта ё маҷрӯҳ шуданд ва зиёда аз 14 ҳазор нафар зери овораҳо бенишон гаштааст.
Дар ҳамин ҳол ҲАМОС расман эълон кард, ки дар рӯзҳои ахир Исроил чанд нафар аз аъзои калидӣ ва фармондеҳони ин гурӯҳро, аз ҷумла, мудири умури молӣ, мудири кулли дастгоҳи амнияти дохилӣ ва чанд узви аршади дафтари сиёсияшро ба қатл расонидааст.
Ёдовар мешавем ки аз 19-уми январи соли ҷорӣ миёни ҲАМОС ва Исроил оташбас ба имзо расида буд, ки тибқи он тавофуқнома, оташбас аз се марҳила иборат буд ва ҳар марҳила 42-рӯзиро дар бар мегирифт, вале Исроил тибқи шартҳои муқаррар амал накард ва дар ниҳоят субҳи 18-уми марти соли 2025 артиши Исроил ҳамлаҳои худро дар Навори Ғазза аз сар гирифта, минтақаҳои гуногуни онро шадидан бомборон кард.
Ба гуфтаи Ҳукумати Натанёҳу, тасмими дигарбора ҳамла кардан ба Ғазза пас аз он гирифта шуд, ки ҲАМОС пешниҳоди намояндаи Амрико Стив Витковро дар мавриди якбора озодсозии гаравгонҳо рад кард.
Аммо ҳаракати ҲАМОС мегӯяд, пешниҳоди намояндаи Амрико танҳо манофеи Исроилро ба назар гирифтаасту хостаҳои ин ҳаракат ба инобат гирифта нашудааст.
Бино ба иттилои созмонҳои ҳуқуқӣ, вазъи инсонӣ дар Ғазза бисёр вахим аст, аз рӯзи 18- уми март то кунун бомборонҳои шадиди Исроил идома дорад. Шароити муҳосираи Ғазза вазъро дар ин борика сахттар мекунад, зеро гузаргоҳҳо барои кумакҳои башардӯстона ва лавозимоти тиббӣ аз 2-уми марти соли ҷорӣ баста шудаанд.
Созмони Милали Муттаҳид дар баёнияе изҳор дошт, ки пас аз саргирии ҳамлаҳои Исроил ба Ғазза тақрибан 124 ҳазор нафар дубора муҳоҷир шудаанд ва шароити будубош тоқатфарсо шудааст.
