29-уми сентябр соли 2025 кормандони консулгарии умумии Афғонистон дар шаҳри Бони Олмон фаъолияти худро қатъ намуда, ба нишони эътироз дастаҷамъона истеъфо доданд.
Ба гуфтаи онҳо, ин қарор пас аз он гирифта шуд, ки мақомоти Олмон иҷозати фаъолият ба намояндагони Толибон дар консулгариро доданд.
Собиқ кормандони консулгарӣ изҳор доштанд, ки дар чунин шароит идомаи корро ғайриимкон медонанд. Онҳо аз ҷумла таъкид намуданд, ки тасмими Олмон мухолифи арзишҳо ва ормонҳое мебошад, ки онҳо то имрӯз ҳифз мекарданд.
Ин кормандон соли 2021, пеш аз ба қудрат омадани Толибон таъйин шуда буданд ва баъдан ҳам дар Олмон ба намояндагии ҳукумати пешини Афғонистон фаъолият мекарданд, гарчанде дигар аз ҷониби Кобул расман эътироф намешуданд.
Ба иттилои расонаҳои олмонӣ, ворид шудани намояндагони Толибон ба консулгарии Бон яке аз омилҳои асосии ин истеъфоҳо будааст. Ҳамзамон созмонҳои ҳомии ҳуқуқи инсон аз вазъи Афғонистон, бахусус саркӯби занон ва афзоиши шиканҷаву қатлҳо дар зиндони Толибон изҳори нигаронӣ доранд
