Доналд Трамп, рӯзи 9-уми декабр дар як мусоҳиба бо нашрияи Politic ишора кард, ки мумкин аст Вашингтон ҳимояи худ аз Украинаро қатъ кунад.
Ӯ гуфтааст, ки Украина бояд пешниҳоди ӯро дар бораи вогузор кардани бахше аз хокаш ба Русия баррасӣ кунад. Ба гуфтаи Трамп, “Русия дар ҷанг дасти боло дорад” ва Владимир Зеленский бояд барои хотимаи ҷанг “ҳамкорӣ кунад”.
Ин изҳороти Трамп дар ҳоле садо медиҳад, ки президенти Украина Владимир Зеленский рӯзи душанбе, 8-уми декабр дар Лондон бо раҳбарони Бритониё, Фаронса ва Олмон мулоқот анҷом дод.
Гуфта мешавад, ин дидор бо иштироки Кир Стармер, Эммануэл Макрон ва Фридрих Мерц сурат гирифта, ҷонибҳо ба як мавқеи муштараки амниятӣ расиданд ва роҳҳои нави дипломатиро барои пешбурди сулҳ дар Украина баррасӣ карданд.
Зеленский баъд аз мулоқот эълон кард, ки Киев дар наздиктарин фурсат фарзияи ниҳоии “нақшаи навшудаи сулҳ”-ро ба ИМА пешниҳод мекунад. Ӯ гуфт, ки ин нақша бояд заминаи ягонаи дипломатӣ байни Киев, Вашингтон ва муттаҳидони аврупоӣ бошад.
Раисҷумҳури Украина шоми душанбе ба рӯзноманигорон гуфт, ки қисмҳои “зидди украинӣ”-и мавҷуда дар тарҳи аввали пешниҳодшуда аз ҷониби Амрико дар моҳи ноябр ҳазф шудаанд. Ӯ ҳамзамон иқрор кард, ки ҳанӯз дар бораи супурдани хоки Украина нигарониҳо вуҷуд доранд ва роҳи ҳалли нав пайдо нашудааст. Амрико пешниҳод кардааст, ки Украина ҳамаи нерӯҳои худро аз минтақаҳои шарқии ин кишвар, ки Русия мехоҳад тасарруф кунад, берун барорад. Гуфта мешавад, Русия ҳоло 75 дарсади Донбассро дар даст дорад, вале натавонистааст, ки тамоми онро тасарруф кунад.
Раҳбарони аврупоӣ гуфтанд, ки музокирот “самаранок” буд ва Аврупо омода аст, дастгирии худро ба Украина идома диҳад.
