Додгоҳи ноҳияи Октябри шаҳри Санкт-Петербурги Русия 25-уми моҳи ҷорӣ ҳукми ронанди автобус Раҳматшоҳ Қурбоновро эълон кард.
Бино ба иттилои расонаҳои Русия, Додгоҳ Раҳматшоҳ Қурбоновро бо қисми 5 моддаи 264-и Кодекси ҷиноии ин кишвар (нақзи қоидаҳои ҳаракати роҳ, ки аз беэҳтиётӣ боиси марги ду нафар ва ё зиёда аз он мегардад,) гунаҳкор дониста, ӯро ба шаш соли зиндон маҳкум кард. Додгоҳ бар иловаи ин ҳукм, боз Қурбоновро 2 солу 6 моҳи дигар ӯро аз ҳаққи ронандагӣ маҳрум кард.
Ин муҳоҷири тоҷик, ки шаҳрвандии Русияро дошт ва дар ин кишвар ба рондани автобус машғул буд, қаблан дар мурофиаҳои додгоҳӣ гуфта буд, ки системаи тормози автобус вақти рондан аз кор баромада буд, аммо мақомоти ин кишвар мегӯянд, автобус аз қабл тормозаш кор намекард ва Қурбонов дар ҳолати хастагии аз ҳад зиёд автобусро рондааст.
Ширкати “Такси”, ки Қурбонов дар он ба ҳайси ронандаи автобус кор мекард, он замон гуфта буд, ки автобус пеш аз баромадан ба роҳ дар ҳолати хуб қарор дошт ва ронанда низ пас аз истироҳат ба кор баромада буд.
Ёдовра мешавем, ки рӯзи 10-уми майи соли ҷорӣ автобусеро, ки Раҳматшоҳ Қурбонови 44-сола идора мекард, ба дарёи “Мойка” сарозер шуд ва дар натиҷа 7 нафар ба ҳалокат расида чанд нафари дигар захмӣ шуданд.
Худи Раҳматшоҳ Қурбонов дар додгоҳ аз қурбониён ва наздиконашон узр хоста, гуфта буд, ки аз кор баромадани тормоз боиси ин садама гашт.
Дар наворҳое ҳам, ки дар шабакаҳои иҷтимоӣ нашр шуданд, дида мешавад, ки Раҳматшоҳ талош дорад автобусро боз дорад, автобус ба ду мошин бархӯрда, ба дасти рост мегардад ва панҷараро шикаста ба дарё сарозер мешавад.
