Эмомалӣ Раҳмон рӯзҳои 15-17-уми март бо сафари расмӣ дар Русия қарор дошт. Ӯ имрӯз бо раисҷумҳури Русия Владимир Путин мулоқот кард.
Вазорати корҳои хориҷии Тоҷикистон қаблан гуфта буд, қарор аст дар ин сафр раисҷумҳурони ду кишвар масъалаҳои сиёсӣ, амниятӣ, иқтисодӣ, тиҷоратӣ, фарҳангӣ ва гуманитарии ду кишвар, ҳамчунин мавзуҳои минтақавию байналмилалиро баррасӣ кунанд ва чанд санади муҳими ҳамкорӣ ба имзо расад.
Дмитри Песков, сухангӯи Кремл ба расонаҳо гуфт, ки “дар рӯзҳои истироҳатӣ Путин ва Раҳмон аллакай мулоқотҳои ғайрирасмӣ дар танҳоӣ доштанд. Имрӯз бошад, чанд вохӯрӣ ва чорабиниҳои расмӣ ба нақша гирифта шудаанд.”
“Ду президент тавассути видеоконфронс оғози сохтмони Маркази байналмилалии таълимӣ барои кӯдакони боистеъдод дар Душанбе ва ҳамчунин оғози сохтмони Театри давлатии драмавии русӣ ба номи Маяковскийро эълон хоҳанд кард”, – гуфт Песков.
Сухангӯи Кремл таъкид кард, ки “Рӯйхати масъалаҳои муҳокимашаванда васеъ аст. Тоҷикистон барои мо шарики хеле наздик ва стратегии мост”.
Тавре расонаҳо иттилоъ доданд, мулоқоти Раҳмону Путин аввал дар шакли алоҳида ва дур аз расонаҳо ва сипас гуфтушунидҳо дар сатҳи ҳайатҳои ҳукуматӣ идома хоҳанд ёфт.
Аммо то кунун маълум нест Раҳмон масоили ахири мушкилоти муҳоҷирони тоҷикро бо ҳамтои русаш ба миён мегузорад ё на. Қазияи дур кардани фарзандони муҳоҷирон, аз ҷумла муҳоҷирони тоҷик аз мактабу таълим ва афзоиши фишорҳои зиёд болои онҳо аз масъалаҳоест, ки муҳоҷирони тоҷик таваққуъ доранд Эмомалӣ Раҳмон онҳоро бо Путин ба миён гузорад ва мушкилашон рафъ шавад.
