Эмомалӣ Раҳмон имрӯз 2 июн бо як сафари расмӣ вориди шаҳри Исломободи пайтахти Покистон шуд. Дар ин бора дафтари матбуоти Президенти Тоҷикистон хабар дод.
Дар ин сафар Раҳмонро вазири корҳои хориҷӣ, ёрдамчии Президент дар масъалаҳои робитаҳои хориҷӣ, вазирони нақлиёт, фарҳанг, маориф ва илм, директори Агентии назорати давлатии молиявӣ ва мубориза бо коррупсия, раисони Кумитаи ҳолатҳои фавқулодда ва мудофиаи гражданӣ, Палатаи савдо ва саноат ва дигар шахсони расмӣ ҳамроҳӣ мекунанд.
Гуфта мешавад, қарор аст Президенти Тоҷикистон бо ҳамтои покистонияш дар чанд соҳа, аз ҷумла соҳаи амният, сиёсат, тиҷорат, фарҳанг ва дигар масоил баҳсу гуфтугӯ кунанд. Инчунин мулоқоти Раҳмон бо Президент ва Сарвазири давлати Покистон дар назар аст.
