Фаъолон ва мухолифони тоҷик дар шаҳрҳои гуногунони Аврупо алайҳи сафари Эмомалӣ Раҳмон ба Италия гирдиҳамоиҳои эътирозӣ барпо карданд.
Имрӯз, 25-уми апрел Алим Шерзамонов, муовини раиси Паймони миллии Тоҷикистон дар назди бинои Иттиҳодияи Аврупо дар шаҳри Варшаваи Лаҳистон бо шиори “Фикр мекардам Аврупо тарафдори зиндагӣ аст”, эътироз кард.
Алим Шерзамонов дар суҳбат бо Azda.tv ҳадаф аз баргузории якчунин эътирозро дар он гуфт, ки набояд кишварҳои ИА диктатор ва ҷинояткори ҷангиеро мисли Раҳмонов бо баҳонаи берун баровардан аз нуфузи Путин қабул кунанд.
“Расо ду сол пеш, дар моҳи майи соли 2022 пас аз Бучаи украинӣ, Раҳмон Бучаи худро ба саҳна гузошт – дар миқёси даҳшатноктар ва ғайриинсонӣ. Ин ҳодиса дар шаҳраки Вомари ноҳияи Рӯшони Вилояти Мухтори Кӯҳистони Бадахшон, дар замине ки ниёгонам дар он асрхо умр ба cap бурдаанд, рӯй дод. Дар ин фоҷиаи хунин на танҳо сарбозони ӯ, балки зархаридони рус низ ширкат доштанд. Қариб панҷох нафар одамони бегуноҳ кушта шуданд, фарзандони онҳо ятим монданд” – мегӯяд муовини раиси ПМТ.
Шерзамонов инчунин мегӯяд, ки Раҳмонов қабл аз сафараш ба Аврупо ба хадамоти вежааш амр додааст, ки хешу табори фаъолонро дар Тоҷикистон гаравгон бигиранд, то фаъолони сиёсии дар Аврупобуда, алайҳи сафари ӯ гирдиҳамоӣ ва пикетҳо ташкил накунанд.
Ёдовар мешавем, ки пештар аз ин намояндагони ПМТ дар Лаҳистону Литва ва Олмон дар назди сафоратхонаҳо ва консулгарии Италия дар Варшава, Вилнюс ва Дортмунд гирдиҳамоии эътирозӣ ташкил карда, изҳороти ПМТ-ро дар мавриди сафари Эмомалӣ Раҳмон ба Италия ба дипломатҳои итолиёӣ супориданд.