Бояд ҳамаи факултаву бахшҳои донишгоҳу донишкадаҳо – ва умуман ҳама бахшҳои марокизи дониширо дар Тоҷикистон баст!
Чиро?
Зеро аксари хатмкунандагонашон ҷои кор намеёбанду ночоранд Русия раванд.
Қаблан ҳам боақлтарини боақлҳо дар хутбае аз хутбаҳояшон фармуда буданд, ки: “Мо коргоҳҳои қолибофиро дигар аз паяш намегардем. Эрон қолин дорад бас…”
Ҳамин тавр, чун ҳамаи истеҳсолотро Чин дораду моро таъмин мекунад, пас дигар ҳеч донишгоҳу донишкадае ҳам лозим нест.
Танҳо як Донишгоҳи бузург лозим дорем, ки метавонад як факулта дошта бошад ва албатта зери номи ин Донишгоҳу факултаи ягонаи он бояд ҷумлаи “дар назди пирезиденти Тоҷикистон”-бошад!
Ин Донишгоҳ “Лес” ва факултаи ягонаи он “ФАКЛЕС” ном дошта метавонад!
Албатта дар забони умумии форсӣ калимаи “Факлес” наву номафҳмост, аммо дар “забони тоҷикӣ” ҳама онро мефаҳманд.
Бахши русии ин Донишгоҳу факултаи ягонаи он низ ҳатмист ва онро “ЛЕСФАК” метавон ном гузошт.
Ин Донишгоҳу факултаи ягонаи он дар шароити кунунӣ ва дар миёни донишгоҳҳои ҷаҳон бемонанд хоҳад буд ва Кишвари моро зуд “ба пеш” мебарад!
Чунин Донишгоҳу факултаи онро ҳеч кишваре надорад!
Хубии ин Донишгоҳ он аст, ки барои донишҷӯи он шудан шарт нест аз деҳот, аз шаҳристонҳо, шаҳрҳо, устонҳо, ҳаволии Пойтахт, пулу вақт сарф карда ба Пойтахт оянд.
Метавон дар худи деҳа, шаҳристон, устон, Пойтахт ва ҳатто дар Русия истода ба он қабул шуд ва бо Дипломи сурх ё сабз ё ҳар ранги дигар онро тамом кард.
Дорандаи Дипломи ин Донишгоҳ барои гирифтани мансаб, унвони илмӣ, ёфтани шароити хуб ҳеч мушкиле нахоҳад дошт!
Ба ин васила хоҳишмандон соҳиби Дипломи факултаи Факлеси Донишгоҳи Давлатии Миллии Лес-и назди президенти Ҷумҳурии Тоҷикистон мешаванд!
Шумо дар нигораи зер метавонед ҳолати супоридани имтиҳонро ба ин Донишгоҳу факулта ба хубӣ тасаввур намоед!
ИЛОВА:
УНВОНҲОИ ИЛМӢ ВА БАРОБАРҲОИ ПОРСИИ ОН ДАР ИН ДОНИШГОҲУ ФАКУЛТАИ ОН
Навлескор / Навниятлескор – баробари русии “абитурент”;
Лесишҷӯ – баробари вожаи аз коруфтодаи “донишҷӯ” ва калимаи русии он “студент”;
Лесисто – баробари вожаи русии “асистент”;
Лесёр – баробари унвони “дотсент”;
Лесишпижӯҳ – баробари таъбири аз коррафтаи “донишпижӯҳ”;
Лесишсаркор – баробари унвони бадшудаи “доктори илм”;
Пурралесишорсаркор – баробари унвони бадшудаи “пруфесур”;
Лесик – баробари унвони бадшудаи “академик”;
КОРҲОИ ИЛМӢ ДАР ИН ЗАМИНА БОЯД ЗЕРИ УНВОНҲОЕ ҲАМОНАНДИ НАМУНАҲОИ ЗЕР СУРАТ БИГИРАНД:
“Пешинаи торихи пасолесӣ”;
“Пасолесӣ дар даврони Шӯравӣ”;
“Пасолесии пасошӯравӣ”;
“Хокзанӣ ва пасолесӣ дар назм”;
“Саромадони назми хокзанӣ, регрезапошӣ ва пасолесӣ”;
“Бузургтарин нозимон ва нависандагони пасолеси рӯзгори мо”;
“Бунёнгузори илми Лесулужӣ”;
“Пешлесони муосир”;
“Нақши роҳбарони бузург дар заминаи пешо-пасолесолужӣ”;
Бознашр аз саҳифаи фейсбукии рӯзноманигор ва шоири тоҷик Исфандиёри Назар
Аз идораи сомона: Гӯшаи “Блоги Шумо” минбари гуногунандешӣ буда, матолибе, ки дар ин гӯша ба нашр мерасанд, назари шахсӣ ва таҳлили муаллифон буда, баёнгари мавқеи “Azda tv” нестанд.
